Ndërthurja e lëvizjes, muzikës dhe interpretimit skenik solli një krijim të ri të kërcimit bashkëkohor. “Minus 303” shënoi premierën botërore në Tiranë. Shfaqja paraqiti një gjuhë artistike, ku elementet koreografike dhe muzikore u bënë pjesë e një përvoje të përbashkët skenike. “Minus 303”, një krijim nga was bleibt kollektiv | Gentian Doda, erdhi mbrëmjen e 5 nëntorit në skenën e Teatrit Kombëtar të Operës dhe Baletit , duke u bërë dhe pjesë e aktiviteteve artistike këtë nëntor. Nën regjinë dhe koreografinë e Gentian Dodës, shfaqja solli një përvojë të artistike, ku lëvizja, muzika live dhe interpretimi u ndërthurën në një gjuhë të përbashkët skenike.
Në skenë interpretuan Fjorald Doci, Rovena Shqevi dhe Rosella Pellicciotti, nën tingujt e muzikës live të Rajkard Bardhit. Pjesëmarrës ishin dhe Alvjano Projku, Dhimitrulla Gjika, Emiljano Hajdari, Florjan Rama, Katerina Bylyku, Kira Miraj, Klea Mimani, Klodian Gjonpalaj, Ledjon Bitri dhe Vasil Sterjo. “Minus 303” është një produksion i Tek Bunkeri dhe was bleibt kollektiv | Gentian Doda, në partneritet me Heinrich Böll Stiftung – Tirana Office dhe Teatri Kombëtar i Operës dhe Baletit. Shfaqja “Minus 303” erdhi në skenën e TKOB-së pas koncertit të mbrëmjes së 3 nëntorit, i cili solli vepra muzikore nga krijimtaria e autorëve shqiptarë dhe të huaj. Programi artistik i Teatrit Kombëtar të Operës dhe Baletit do të vijojë gjatë këtij sezoni me shfaqje dhe koncerte të tjera për publikun.
“Minus 303” pjesë e krijimtarisë koreografike
Shfaqja “Minus 303”, e prezantuar në skenë në premierën e saj botërore në nëntor, është pjesë e krijimtarisë koreografike të Gentian Dodës, i cili ka ndërtuar një karrierë ndërkombëtare në fushën e kërcimit bashkëkohor. Përmes punës së tij, Doda ka bashkëpunuar me emra të njohur të koreografisë botërore dhe ka prezantuar krijimet e tij në skena të ndryshme ndërkombëtare. Gentian Doda e nisi karrierën e tij si balerin në disa prej kompanive më prestigjioze evropiane, ku punoi me koreografë të njohur si Nacho Duato, Mats Ek, Jiří Kylián, William Forsythe, Ohad Naharin, Wim Vandekeybus dhe Maurice Béjart. Karrierën e tij si koreograf e nisi në vitin 2005, në Compañía Nacional de Danza në Spanjë. Ka krijuar vepra për institucione dhe skena ndërkombëtare, si Juilliard School në Nju Jork, Scapino Ballet Rotterdam, Baleti Kombëtar Grek, Staatsballett Berlin, Teatro Massimo di Palermo, Staatsballett Nürnberg dhe Gärtnerplatztheater, si dhe për Muzeun Prado, Festivalin e Muzikës Elektronike Sónar dhe Festivalin Madrid en Danza.
Krijimtaria e tij përfshin bashkëpunime në formate dhe kontekste të ndryshme artistike, duke ndërthurur përvojën në baletin klasik me gjuhën e kërcimit bashkëkohor dhe kërkimin koreografik. Gentian Doda mori pjesë gjithashtu edhe në Bienalen e Artit të Venecias 2024, në bashkëpunim me Pavijonin Meksikan. Me shfaqjen “Minus 303”, Gentian Doda prezanton një tjetër krijim të tij koreografik, këtë herë përmes premierës botërore në skenën e Tiranës.
