Presidenti amerikan Donald Trump do të nënshkruajë sot një urdhër ekzekutiv për vendosjen e sanksioneve ndaj Gjykatës Ndërkombëtare Penale (ICC), sipas tij, për “shënjestrimin e pahijshëm” të SHBA-së dhe Izraelit.
Sipas një kopjeje të dokumentit të siguruar nga NBC News, urdhri do të përfshijë sanksione financiare dhe kufizime vizash për një numër zyrtarësh të ICC-së që morën pjesë në hetimet ndaj “qytetarëve ose aleatëve” të SHBA-së. Nëntorin e kaluar, gjykata lëshoi urdhra arresti për kryeministrin izraelit Benjamin Netanyahu dhe ish-ministrin e tij të mbrojtjes në lidhje me luftën në Rripin e Gazës.
Gjykata tha se kishte arsye për të besuar se Netanyahu dhe Gallant përdorën “urinë si një metodë lufte” duke kufizuar ndihmën humanitare dhe duke synuar qëllimisht civilët në fushatën e Izraelit në Gaza – akuza që zyrtarët izraelitë i hodhën poshtë si të rreme dhe antisemitike.
Në mandatin e tij të parë, Trump argumentoi se Gjykata Penale Ndërkombëtare “nuk ka juridiksion, nuk ka legjitimitet dhe nuk ka autoritet” në SHBA dhe as SHBA-ja dhe as Izraeli nuk janë palë në të ashtuquajturin Statuti i Romës, i cili themeloi gjykatën.
“GJPN-ja ishte krijuar për të qenë një gjykatë e zgjidhjes së fundit,” thuhet në fletën e të dhënave në urdhrin ekzekutiv. “Si Shtetet e Bashkuara dhe Izraeli mbajnë sisteme të fuqishme gjyqësore dhe nuk duhet t’i nënshtrohen kurrë juridiksionit të GJNP-së”.
Në fillim të këtij viti, Dhoma e Përfaqësuesve miratoi një projekt-ligj për të sanksionuar ICC-në, i cili më vonë u bllokua nga Demokratët në Senat.
As Izraeli dhe as SHBA nuk e njohin juridiksionin e ICC-së, e cila është e vendosur në Hagë, Holandë, dhe nuk ka polici për të zbatuar urdhërat e saj. Sipas statutit të Romës që e krijoi atë, nënshkruesit janë të detyruar të zbatojnë urdhër-arrestet, pavarësisht nga grada e të akuzuarit. Por shumica e qeverive respektojnë gjithashtu parimin juridik ndërkombëtar se krerët e shteteve kanë imunitet ligjor nga gjykatat e tjera.
***
Më herët gjatë ditës së sotme, presidenti amerikan njoftoi se Rripi i Gazës do t’i dorëzohet Shteteve të Bashkuara nga Izraeli pasi të përfundojnë luftimet. Palestinezët, shtoi ai, “do të rivendoseshin në komunitete shumë më të sigurta dhe më të bukura, me shtëpi të reja, moderne, në rajon” dhe “do të kishin vërtet mundësinë për të qenë të lumtur, të sigurt dhe të lirë”. “Shtetet e Bashkuara, duke punuar me ekipe të mëdha zhvillimi nga e gjithë bota, do të fillojnë ndërtimin e asaj që do të bëhej një nga zhvillimet më të mëdha dhe më spektakolare të këtij lloji në tokë. SHBA nuk do të kishte nevojë për ushtarë dhe stabiliteti do të mbretëronte në rajon”, përfundoi Trump.
Nga ana e tij, Netanyahu tha se propozimi i presidentit amerikan për të marrë kontrollin e Rripit është një “ide e jashtëzakonshme” që duhet “të ndiqet”, “shqyrtohet” dhe “realizohet”.
Në një intervistë me transmetuesin amerikan “Fox News”, Netanyahu tha: “Unë mendoj se ai do të krijojë një të ardhme të ndryshme për të gjithë”. Kryeministri komentoi gjithashtu: “Vetë ideja për të lejuar Gazanët që duan të largohen, të largohen. Dua të them, çfarë nuk shkon me këtë?” “Ata mund të largohen. Më pas ata mund të kthehen. Ata mund të lëvizin dhe të kthehen, por Gaza duhet të rindërtohet (…) kjo është ideja e parë e mirë që kam dëgjuar”, tha Netanyahu, duke shtuar se Izraeli është ende i përkushtuar për të shkatërruar aftësitë ushtarake dhe politike të Hamasit, në mënyrë që të mos përbëjë më kurrë një kërcënim për shtetin hebre.
“Ne kemi shkatërruar pjesën më të madhe të fuqisë ushtarake të Hamasit deri më tani, jo të gjithë atë (…) do të sigurohemi që të mos jetë aty kur të përfundojë kjo luftë dhe mund të përfundojë shumë shpejt,” tha kryeministri, i cili tha se kthimi i Trump në Shtëpinë e Bardhë kishte pasoja në të gjithë Lindjen e Mesme dhe kishte ngritur shpirtin izraelit.
“Ai ngre shpirtin e të gjithë atyre që duan të shohin një Lindje të Mesme ndryshe, një Lindje të Mesme të begatë dhe paqësore. Mendoj se ndryshon ekuacionin global. Sigurisht që ndryshon ekuacionin në Lindjen e Mesme”, theksoi Netanyahu.
