Arti bashkëkohor sjell në vëmendje çështje që lidhen me gjininë, pozitën e grave në shoqëri, pushtetin dhe pabarazitë shoqërore përmes ekspozitës “Why We Should All Be Feminists”. Ekspozita, e kuruar nga Sabine Fellner me asistencën e Laurenz Fellner, në galerinë e artit “Zeta” në Tiranë bashkon 15 artiste nga Shqipëria, Austria dhe më gjerë. Artistet pjesëmarrëse janë: Elisa Andessner, Stella Bach, Julia Bugram, Katharina Cibulka, Bianca Ion, Lori Lako, Claudia Larcher, Lea Liebl, Anita Münz, Matilda Odobashi, Florentina Pakosta, Monika Pichler, Margot Pilz, Ness Rubey, Gabriele Schöne.
Seria e ekspozitave “Why We Should All Be Feminists” sjell së bashku qasje të ndryshme artistike që trajtojnë çështje të gjinisë, identitetit, pushtetit dhe pjesëmarrjes në shoqëri. Ajo vë në pah mënyrën se si pabarazitë strukturore vazhdojnë të ndikojnë thellësisht dhe të kufizojnë realitetet e jetuara të njerëzve, duke na nxitur ta vendosim barazinë shoqërore si një synim thelbësor. Titulli i ekspozitës i referohet esesë së Chimamanda Ngozi Adichie, e cila mbron një përkufizim bashkëkohor të feminizmit si një aspiratë dhe synim për të gjithë. Kuratorja Sabine Fellner thotë se çështjet e trajtuara në ekspozitë mbeten ende të pranishme dhe të rëndësishme edhe sot. “Kjo ekspozitë bashkon artiste nga breza të ndryshëm.
Në të përfshihen si qëndrime feministe të periudhës së vitit 1968, të përfaqësuara nga artiste që sot janë në të 90-at, ashtu edhe krijime bashkëkohore nga artiste të reja në të 20-at. Në mënyrë shqetësuese, çështjet e trajtuara dëshmojnë se janë ende jashtëzakonisht të pranishme. Shoqata austriake e artisteve gra IntAkt është e bindur se ndryshimi mund të arrihet vetëm “nëse të gjithë-pavarësisht gjinisë-bashkohen”, “sepse feminizmi i vërtetë nuk njeh kufij gjinorë, por ka nevojë për aleatë që ndajnë pushtetin, jo që e përvetësojnë atë”, shprehet ajo. Ky projekt realizohet falë mbështetjes së Ambasadës Austriake në Shqipëri. Ekspozita u hap më 30 shtator dhe mblodhi përfaqësues të artit, kulturës, diplomacisë dhe shoqërisë civile, si dhe një publik të interesuar. Ekspozita do të vijojë të qëndrojë e hapur për publikun deri më 15 tetor.
