Google search engine
Home Bota Reuters: Takimi Trump-Putin-Xi në Kinë, Evropa mblidhet në Berlin për të mbështetur...

Reuters: Takimi Trump-Putin-Xi në Kinë, Evropa mblidhet në Berlin për të mbështetur Ukrainën

0
6

Aleatët evropianë të Ukrainës u mblodhën të enjten në Berlin, në një takim që synonte të shprehte mbështetjen për Kievin, vetëm pak orë pasi presidenti amerikan Donald Trump e cilësoi Vladimir Putinin, kundërshtarin kryesor të Ukrainës, si një “mik”, gjatë një samiti të paprecedentë trepalësh me presidentin kinez Xi Jinping.

Takimi i së enjtes i të ashtuquajturit “Koalicioni i të Gatshmëve”, ku morën pjesë liderët e Gjermanisë, Francës, Britanisë së Madhe, Polonisë dhe Italisë, si dhe sekretari i përgjithshëm i NATO-s, Mark Rutte, zhvillohet në një kohë kur Evropa po kërkon të përfshihet në negociatat e mbështetura nga SHBA-ja për t’i dhënë fund luftës në Ukrainë. Në Berlin ishin të pranishëm edhe të dërguarit e posaçëm amerikanë, Steve Witkoff dhe Jared Kushner.

Ndërkohë, Putini kishte shënuar më herët një sukses diplomatik në samitin e zhvilluar në Shenzhen të Kinës, duke shtuar shqetësimet në Evropë se vendimet që lidhen me luftën në Ukrainë dhe të ardhmen e kontinentit mund të merren pa përfshirjen e vendeve evropiane.

“Zoti Putin nuk është miku ynë dhe nuk do të jetë kurrë”, deklaroi kryeministri polak Donald Tusk, në një kundërpërgjigje ndaj komenteve të Trump.

“E kam shumë të vështirë ta kuptoj se si një president amerikan dëshiron të ulet në tryezë me presidentin Putin”, u shpreh kryeministrja daneze Mette Frederiksen për gazetarët.

“Besoj se Putini do të dalë edhe më i fuqizuar nga takimi i sotëm. Ai duket i kënaqur. Fatkeqësisht, kjo nuk është një shenjë e mirë për paqen në botë. Nuk është as një shenjë e mirë për Ukrainën. Prandaj, mendoj se ajo që do të pasojë është se ai do të godasë edhe më fort ne evropianët”, deklaroi Frederiksen.

Takimi në Shenzhen ka ngjallur krahasime me Konferencën e Jaltës të vitit 1945, ku Shtetet e Bashkuara, Britania e Madhe dhe Bashkimi Sovjetik përcaktuan sferat e tyre të ndikimit. Konferenca është kthyer ndër vite në një simbol të marrëveshjeve mes fuqive të mëdha, të cilat imponohen mbi vendet më të vogla.

“Pritshmëritë e mia për rezultate konkrete janë të ulëta, megjithëse ekziston natyrshëm shqetësimi se kjo mund të shndërrohet në një Jaltë të re, ku bota ndahet në sfera ndikimi”, deklaroi kryeministri suedez Ulf Kristersson, duke iu referuar takimit në Shenzhen.

“Përkundrazi, ne duam të ruajmë një rend ndërkombëtar të bazuar në rregulla, ku çdo komb është i lirë të zgjedhë të ardhmen e tij”, shtoi ai.

Administrata Trump dhe Evropa po largohen gjithnjë e më shumë nga njëra-tjetra

Shtetet e Bashkuara dhe Evropa, aleate të ngushta për dekada pas përfundimit të Luftës së Dytë Botërore, po distancohen gjithnjë e më shumë. Administrata Trump ka reduktuar mbështetjen për Ukrainën, ndërsa u ka kërkuar vendeve anëtare të NATO-s të marrin përsipër një pjesë më të madhe të kostove të mbrojtjes, shkruan Reuters.

Të martën, dallimet mes palëve u bënë edhe më të dukshme, pasi Gjermania dhe Britania e Madhe kundërshtuan kritikat amerikane ndaj sulmeve ukrainase në distancë të thellë kundër infrastrukturës ruse të naftës dhe depove tregtare.

Megjithatë, sekretari i përgjithshëm i NATO-s, Mark Rutte, i cili ka tentuar vazhdimisht të zbusë tensionet brenda aleancës dhe të ruajë mbështetjen e Trump, minimizoi shqetësimet lidhur me samitin me Kinën. Ai e cilësoi si “normale” që liderët e fuqive të mëdha bërthamore të takohen.

“Presidenti Trump ka bërë vazhdimisht përpjekje të jashtëzakonshme për të arritur paqen në Ukrainë dhe unë vetëm mund ta përgëzoj për këtë”, deklaroi Rutte.

Vendet evropiane, të cilat sigurojnë pjesën më të madhe të ndihmës për Ukrainën, janë lënë kryesisht jashtë negociatave të udhëhequra nga SHBA-ja me Moskën.

Përfaqësuesit e tyre morën pjesë në bisedimet e zhvilluara javën e kaluar në Abu Dhabi, por zyrtarët e Kremlinit deklaruan se nuk kishin rënë dakord për përfshirjen e përfaqësuesve evropianë në negociatat e ardhshme.

Pas një pengese të fundit në luftën kundër Ukrainës, të shkaktuar nga dëmtimi i rëndë i një ure të rëndësishme që lidh Krimenë me Rusinë, Putini deklaroi se Rusia, Kina dhe SHBA-ja kanë “shumë interesa të përbashkëta në zgjidhjen e konflikteve rajonale, përfshirë, natyrisht, konfliktin në Ukrainë”.

Ai bëri gjithashtu të ditur se Rusia kishte propozuar që përfaqësuesit evropianë të udhëtonin në Moskë për të sqaruar qëndrimin e tyre mbi negociatat e paqes, përpara se të vendoset formati i bisedimeve të mëtejshme.

Evropa rrit mbështetjen për Kievin përpara dimrit

Takimi i së enjtes në Berlin vjen pas një sërë nismash të aleatëve evropianë të Ukrainës për të forcuar mbështetjen ndaj Kievit, në një kohë kur Rusia ka intensifikuar sulmet ndaj infrastrukturës energjetike dhe objekteve të tjera në qytetet ukrainase, ndërsa vendi po përgatitet për dimrin.

Presidenti ukrainas Volodymyr Zelensky deklaroi se takimi do të krijojë mundësinë për të diskutuar negociatat me të dërguarit amerikanë Steve Witkoff dhe Jared Kushner, si dhe për të marrë informacion mbi detajet e bisedimeve që Trump ka zhvilluar në Kinë.

“Ukraina e shpreh qartë dëshirën e saj për paqe dhe ne gjithmonë veprojmë në mënyrë konstruktive”, deklaroi Zelensky.

Të mërkurën, Komisioni Evropian propozoi një kredi të re prej 45 miliardë eurosh (49.5 miliardë dollarë) për Ukrainën, me qëllim mbulimin e një pjese të deficitit financiar prej 70 miliardë eurosh që vendi pritet të ketë vitin e ardhshëm.

Ndërkohë, Grupi i Kontaktit për Mbrojtjen e Ukrainës, një koalicion shtetesh që koordinon ndihmën ushtarake për Kievin, ra dakord këtë javë të dërgojë më shumë armatime në Ukrainë, në mënyrë që vendi të ketë kapacitetin të vazhdojë luftimet edhe gjatë muajve të dimrit.

LEAVE A REPLY

Please enter your comment!
Please enter your name here