Aktori i njohur Ndriçim Xhepa është nderuar me çmimin kryesor të edicionit të 13-të të festivalit “K’tu Fest” në Strugë, në vlerësim të kontributit të tij në teatrin dhe kinematografinë shqiptare. Ceremonia mori një dimension të veçantë emocional kur Xhepa kujtoi të ëmën, aktoren e madhe Margarita Xhepa, e cila kishte një lidhje të veçantë me festivalin dhe Teatrin Poshka. Çmimi iu nda me motivacionin: “Për kontributin e tij të jashtëzakonshëm në artin e skenës dhe të kinemasë, duke sjellë dimensione të reja në mjeshtërinë e aktorit”.
Me këtë rast, Ndriçim Xhepa shprehu mirënjohjen për organizatorët, regjisorët Olsa dhe Xhelo Poshka, të cilët për 13 vjet kanë punuar për ta kthyer Strugën në një pikëtakim të rëndësishëm të artistëve shqiptarë. Çmimi iu dorëzua nga kryetari i Komunës së Strugës, Mendi Qyra, i cili ka mbështetur vazhdimisht Teatrin Poshka dhe aktivitetet e tij kulturore. Ndriçim Xhepa është një nga aktorët më të spikatur të skenës dhe kinematografisë shqiptare, i njohur për mjeshtërinë dhe interpretimet e tij artistike. Me një karrierë të pasur në teatër dhe film, ai mbetet një emër i rëndësishëm i artit shqiptar.
Festivali “K’tu Fest” që zhvillohet në Strugë në Maqedoninë e Veriut vazhdon traditën e vlerësimit të personaliteteve që kanë dhënë kontribut të veçantë në artin dhe kulturën shqiptare. Në edicionin e kaluar, çmimi iu nda gazetares Dijana Toska, e njohur edhe si organizatore e koncertit në Vatikan kushtuar Nënë Terezës. Përmes këtij festivali, Struga vijon të mbetet një hapësirë e rëndësishme takimi dhe promovimi për artistët dhe vlerat e kulturës shqiptare.
