Kjo javë do të jetë vendimtare sa i takon fatit të Sali Berishës lidhur me dosjen “Hajdari”. Edhe pse kanë kaluar 22 vite nga ekzekutimi i deputetit socialist, kjo çështje vijon të jetë e pazbardhur totalisht. Disa persona janë dënuar dhe sipas gjykatës janë ata që shkrepën këmbëzën, por nuk dihen ende arsyet dhe kush fshihej pas tyre. Shpresat janë që gjithçka të zbardhet gjatë procesit të Izet Haxhisë, i cili ka qenë truprojë i Berishës në atë kohë. Haxhia dhe prokuroria kanë kërkuar që Berisha të thirret si dëshmitar. Seanca vendimtare ishte me datë 9 tetor, ku pritej vendimi i gjykatës, por u shty për shkak se avokati Idajet Beqiri ishte infektuar me Covid-19. Gazeta kontaktoi me avokatin, i cili e kaloi virusin dhe në seancën e 23 tetorit do të jetë i pranishëm në sallë ku do të merret vendimi i gjykatës. Mirëpo gazeta ka mësuar se do të ketë surpriza. Vetë avokati tha se klienti i tij i ka thënë se në seancë do të kërkojë si dëshmitar një personazh surprizë. Ende nuk dihet se për kë bëhet fjalë, por pritet që vetë Haxhia ta kërkojë në seancë dhe dëshmia e tij pritet të jetë kyçe në proces. Nga ana tjetër Izet Haxhia ka vendosur që të mos thërrasë si dëshmitar Fatos Klosin. Ky i fundit u përplas ashpër me Berishën pak ditë më parë pasi akuzojnë njëri-tjetrin si të përfshirë në ngjarje. Mirëpo avokati i Haxhisë e ka parë të arsyeshme që të mos e thërrasë në këtë proces. Klosi është treguar disa herë i gatshëm se nëse e thërrasin do të paraqitet në seanca dhe do të tregojë se çfarë informacionesh ka pasur Shërbimi Informativ në atë kohë për vrasjen e Hajdarit. Berisha thotë se ishte Klosi ai që e nxori në pritë Hajdarin, ndërsa Klosi deklaron se i vetmi që përfitonte nga vrasja e Hajdarit është Sali Berisha. Megjithatë seanca e së premtes do të vendosë se çfarë do të ndodhë. Gjyqtari pritet që të pranojë kërkesat e prokurorisë dhe Haxhisë dhe për herë të parë Berisha do të japë sqarime në seancë mbi informacionet që ka pasur në eliminimin e Hajdarit.
Arsyet e thirrjes së Berishës
Në kërkesën dorëzuar në gjykatë, avokati Idajet Beqiri ka dhënë arsyet se përse Berisha duhet të jetë dëshmitar në këtë çështje. “Në fashikullin e gjykimit, në faqet 707-708-709-710 ndodhet Deklarata e Partisë Demokratike e firmosur në datën 16 korrik 1999 nga dëshmitari Sali Berisha dhe i ngarkuari me Punë në Ambasadën e SHBA në Tiranë, Robert H. Frowik. Në këtë deklaratë Sali Berisha jep me hollësi gjithë versionin e ngjarjes, orën e saktë të ndodhjes së krimit, si e ka dëgjuar atë, kush ishin qëlluar, nga kush u qëlluan, me kë ishte takuar Azem Hajdari para se të shkonte në vendin e krimit etj etj, shpjegime të hollësishme të kësaj dite ngjarje dhe të ditëve të tjera para dhe pas saj. Deklarimet e Berishës para gjykatës janë të domosdoshme. Ai nuk ka qenë i pranishëm në vend ngjarje, por është personi i parë që i ka shkuar i gjithë informacioni për ngjarjen nga dëshmitarët okularë, të cilat ai i ka bërë pjesë të deklaratës së tij”, thuhet në kërkesën e Izet Haxhisë. Sipas tij, deklarimet e Sali Berishës se cilët ishin personat që i dhanë atij të gjitha hollësitë e ngjarjes, autorët e krimit me emër dhe mbiemër të përmendur prej tij në deklaratë, gjithë mekanizmin lëvizës të secilit person ditën e ngjarjes, mjetet dhe targat e tyre që u përdorën në krim, duhen shpjeguar nga kush i mësoi Sali Berisha që i bëri pjesë të dosjes hetimore dhe gjyqësore organi i akuzës dhe gjykata.
