Premiera e re “Aladini” vjen si muzikal për fëmijët në Teatrin e Kukullave. Për herë të parë publiku i Teatrit të Kukullave vendoset vërtetë në mes të ngjarjeve; në mes të Agrabas, qytetit të shkretëtirës, nxehtësisë, intrigave, tapeteve fluturues, xhindeve dhe dashurisë. Plot efekte speciale, plot ngjyra, dritë dhe mesazhe për fëmijët që rriten. Një muzikal gjithëpërfshirës. Një llambë magjike kërkohet nga intriganti Xhafar, veçse askush nuk mund ta marr përveçse një hajduti shpirtmirë, një tip “Diamanti i dorës së parë”, siç është Aladini. Shfaqja do jetë për publikun në datë 28 dhe 29, ora 10:30 dhe 11:30 në teatër. Drejtori i institucionit Fajton Sulstarova, shprehet se kjo shfaqje që është e kërkuar nga fëmijët, vjen në skenë dhe me një formë ndryshe. “Vijmë me një premierë të re për këtë sezon, me një shfaqje muzikale, të cilat janë shumë të kërkuara nga fëmijët, dhe “Aladini” është një ndër të preferuarat e tyre. Tani fëmijët do kenë mundësi ta shohin në teatër në një formë krejt ndryshe, ku ndërthuret aq bukur fjala, kënga dhe kërcimi”, pohon drejtori i institucionit për këtë premierë në teatër. Regjia e premierës “Aladini” i është besuar Endri Çelës, i cili sipas drejtorit të teatrit ka bërë një punë shumë të mirë e profesionale. “Aktorët janë pjesë e trupës artistike të teatrit, por ajo që më duhet ta theksoj është se “Aladini” këtë herë vjen nga Universiteti i Arteve”, pohon më tej drejtori Fatjon Sulstarova. Së shpejti kjo shfaqje premierë do të jetë në skenë për fëmijët këtë sezon artistik, por drejtori i teatrit Fatjon Sulstarova shprehet se me këtë projekt realizohet dhe një nga pikat e marrëveshjes së paktit të studentëve me Universitetin e Arteve, Ministrisë së Kulturës dhe këtij institucioni. “Aktori, i cili luan rolin e Aladinit është student i këtij universiteti”, tregon më tej drejtori Fatjon Sulstarova. Sezoni artistik sjell këtë shfaqje teatrore, por drejtori Fajton Sulstarova pohon se deri në muajin dhjetor do të zhvillohen edhe shumë aktivitete e premiera të reja, shfaqje sociale, etj. Sipas tij, “Erdhi Teatri” do vazhdojë edhe në vende te tjera për të qenë sa më pranë edhe atyre fëmijëve, që nuk kanë pasur mundësi të shohin e ta prekin nga afër një shfaqje teatri.
