Futbollisti i Barcelonës, Rafinja, u kthye nga grumbullimi me Brazilin me një lëndim. Sulmuesi 29-vjeçar u detyrua të zëvendësohej gjatë miqësores së dytë të “Seleçaos” kundër Australisë për shkak të shqetësimeve fizike dhe u kthye në Spanjë pak më vonë për t’iu nënshtruar ekzaminimeve. Për fat të mirë, ekzaminimet nuk zbuluan ndonjë lëndim serioz te reprezentuesi brazilian, por Barcelona ka vendosur të mos rrezikojë me rikthimin e tij, duke pasur parasysh atë që ndodhi sezonin e kaluar, kur ai u rikthye në fushë para kohe.
Në këtë drejtim, “SPORT” raporton se, nëse gjithçka shkon sipas planit, rafinja pritet të rikthehet në aksion për Barcelonën kundër Paris San Zhermen. Kapiteni i klubit zhvilloi një pjesë të stërvitjes të hënën, përpara se skuadra të nisej drejt Turqisë për ndeshjen e sontme të Ligës së Kampionëve të UEFA-s kundër Gallatasarait.
Pas kthimit, rafinja pritet të përfshihet gradualisht në stërvitjet me grupin, duke rritur dalëngadalë ngarkesën dhe intensitetin e punës. Megjithatë, në këto rrethana, duket e pamundur që ai të jetë i gatshëm për t’u përballur me Real Betisin në La Liga më vonë gjatë kësaj jave.
Gjithçka tregon se rikthimi i tij do të ndodhë kundër PSG-së në Ligën e Kampionëve javën e ardhshme. Këtë e la të kuptohej edhe presidenti i Barcelonës, Joan Laporta, i cili tha në një intervistë në fillim të kësaj jave: “Ai u lëndua, u kthye dhe është rikuperuar këtu. Mjekët thonë se do të jetë i gatshëm për ndeshjen në Paris. Këto janë situata që duhet t’i pranojmë”. Rafinja është shndërruar në sulmuesin më të rrezikshëm të Barcelonës në këtë sezon.
Pasi u vendos në një rol të ri si qendërsulmuesi kryesor i skuadrës, 29-vjeçari ka shkëlqyer, duke shënuar tashmë 14 gola në të gjitha garat. Megjithatë, Barcelona nuk e ndjeu mungesën e tij në ndeshjen e parë pas pauzës së kombëtareve, kundër Getafes fundjavën e kaluar. Bashkëkombësi i Rafinjës, Gabriel Jesus, e zëvendësoi atë në pozitën e qendërsulmuesit dhe e shënoi paraqitjen e tij të parë si titullar me një gol – të tretin që nga transferimi i tij gjatë verës.
Anthony Gordon gjithashtu e shënoi golin e tij të parë për Barçën fundjavën e kaluar dhe mbetet një alternativë reale për të luajtur në qendër të sulmit në mungesë të Rafinjës. Prandaj, është e kuptueshme që Hansi Flik dhe stafi i tij të mos e nxitojnë rikthimin e kapitenit dhe golashënuesit kryesor, por ta rikthejnë gradualisht në fushë, duke pasur parasysh ndeshjet e rëndësishme që e presin skuadrën.
