Parlamenti britani u përball me një situatë të pazakontë seancën plenare të një nate më parë.

Në kulmin e tensioneve dhe debateve rreth “Brexit”, seanca u ndërpre nga burra dhe gra gjysmë të zhveshur.

Protestuesit, pjestarë  të grupit “Rebelimi ndaj Zhdukjes” kërkuan më shumë vëmendje për ndryshimet klimatike.

Ata u vendosën në dritaret që ndan deputetët nga publiku, duke shënuar dhe shkeljet më të mëdha të sigurisë në parlamentin britanik që nga viti 2014.

Protestuesit tërhoqën vëmendjen e deputetëve, mes tyre edhe ish-liderit Laburist, Ed Milliband, që zgurdulloi sytë me habi kur i pa.

Ndërsa një tjetër deputet, laburisti Peter Kyle, e quajti me humor protestën “e vërteta lakuriqe”.

Policia ndërhyri shpejt duke i larguar pjesëtarët e grupit “Rebelimi ndaj Zhdukjes”.

Por deputeti konservator James Heappey shkeli rregullat e sallës dhe i fotografoi protestuesit, pavarësisht thirrjeve të kreut të Parlamentit John Bercow për të injoruar situatën dhe për të vazhduar me debatin për Brexit.