Presidenti amerikan Donald Trump ka deklaruar se një takim mes presidentit rus Vladimir Putin dhe presidentit ukrainas Volodymyr Zelensky mund të zhvillohet shumë shpejt, duke shprehur optimizëm për përparimin e përpjekjeve diplomatike që synojnë t’i japin fund luftës mes Rusisë dhe Ukrainës.
“Një takim do të mbahet shumë shpejt dhe besoj se do të jemi në gjendje të bëjmë përparim të madh”, u tha Trump gazetarëve të hënën, duke iu referuar negociatave për përfundimin e konfliktit që po zgjat prej gati pesë vitesh.
Deklarata e presidentit amerikan vjen në një moment kur Uashingtoni po përpiqet të rikthejë palët në tryezën e bisedimeve, pas ngecjes së përpjekjeve për paqe që nga fillimi i vitit.
Të dielën, presidenti ukrainas Volodymyr Zelensky deklaroi se një takim mes përfaqësuesve rusë dhe ukrainas mund të zhvillohet gjatë muajit nëntor, me ndërmjetësimin e Shteteve të Bashkuara.
“Jemi gati të flasim. Nëse është një çështje territoriale, duhet të diskutohet në nivelin e udhëheqësve. Çështjet e tjera kanë të bëjnë me grupet teknike. Pra, e gjithë kjo mund të diskutohet në nëntor”, tha Zelensky në një intervistë për televizionin shtetëror ukrainas.
Ndërkohë, Rusia ka bërë të ditur se një takim i tillë ishte planifikuar për në nëntor në Abu Dhabi, në Emiratet e Bashkuara Arabe. Nisma shihet si pjesë e përpjekjeve të fundit amerikane për të rifilluar negociatat e paqes, të cilat kanë mbetur të bllokuara që nga fillimi i luftës SHBA-Izrael kundër Iranit në fund të shkurtit.
Bisedime të drejtpërdrejta mes Rusisë dhe Ukrainës janë zhvilluar edhe gjatë vitit 2025, por pa arritur një marrëveshje për përfundimin e konfliktit, pasi të dyja palët kanë vijuar të këmbëngulin në kushtet e tyre. Një nga pengesat kryesore mbetet qëndrimi i Kremlinit ndaj një takimi të drejtpërdrejtë mes Putinit dhe Zelenskyt. Autoritetet ruse kanë përjashtuar deri më tani mundësinë që një takim i tillë të zhvillohet jashtë Moskës. Po ashtu, Moska kundërshton një ndërprerje të luftimeve përpara arritjes së një marrëveshjeje më të gjerë, me argumentin se një armëpushim do t’i jepte Kievit mundësinë të riorganizohej dhe të riarmatosej.
