KQZ regjistron partinë e Astrit Patozit

    0
    406

    Pavarësisht se disa qytetarë kanë shprehur ankesa në KQZ se emri i tyre është vënë fiktivisht mes atyre të firmëtarëve për krijimin e partisë së re Bindja Demokratike, Komisioni Qendror Zgjedhor ka regjistruar forcën e re.

    KQZ-ja e ka regjistruar këtë forcë të re me katër vota pro dhe një kundër. Kundër regjistrimit ka qënë kryetari i KQZ-së, Klement Zguri.

    Sipas zotit Patozi ishin rreth 4 mijë qytetarë që kishin firmosur me vullnetin e tyre për të themeluar Bindjen Demokratike. Por News 24 zbuloi një ditë më parë se me dokumentacionin e dorëzuar në gjykatë disa nga firmëtarët janë fiktivë. Një ndër ta, Dritan Agushi nga qyteti i Kavajës i kontaktuar nga News24 deklaroi se ishte vënë në dijeni nga familjarët që emri i tij ishte në listën e themeluesve. Ai thotë se ndodhet jashtë vendit dhe se firma e tij është falsifikuar, madje premton se do ta ndjekë ligjërisht çështjen.

    Por historia me fallsifikim firmash nuk mbaron me kaq. News 24 zbuloi se disa qytetarë të tjerë, po nga Kavaja, kanë bërë ankim në gjykatë kundër Bindjes Demokratike, duke e akuzuar se ka përdorur firmat e tyre për themelimin e partisë. Padia që disponon News 24, është firmosur nga Zyber Molla, Shyqyri Proshka, Mehmet Sheme dhe Mirjan Krasniqi.

    Qytetarët që kanë verifikuar falsifikimin e dokumentave akuzojnë Gjykatën për shkelje të ligjit, pasi sipas tyre ka bërë regjistrimin e Bindjes Demokratike pa verifikuar firmat. Të katërt qytetarët, që i kërkojnë gjykatës të kthejë mbrapsht si të paligjshëm vendimin për regjistrimin e Bindjes Demokratike, shprehin gatishmërinë e tyre të vendosin para gjykatës specifikimet e shkrimit të tyre për të verifikuar shkencërisht se firmat për rregjistrimin e Bindjes Demokratike janë fallsifikuar.

    LEAVE A REPLY

    Please enter your comment!
    Please enter your name here