Izraeli po vijon operacionet për identifikimin dhe eliminimin e personave të lidhur me sulmin e Hamasit të 7 tetorit 2023. Sipas një raportimi të gazetës saudite Asharq Al-Awsat, në disa raste, shërbimet izraelite të inteligjencës dyshohet se kanë telefonuar objektivat pak para sulmeve, duke u kërkuar të largoheshin nga familjarët për të shmangur vrasjen e tyre. Sipas raportimeve, pas sulmit të 7 tetorit, të orkestruar nga ish-kreu i Hamasit, Yahya Sinwar, Izraeli ngriti një rrjet të gjerë operativ, me përfshirjen e shërbimit të brendshëm të sigurisë Shin Bet dhe Mossad, me qëllim identifikimin dhe lokalizimin e personave që kishin marrë pjesë drejtpërdrejt ose tërthorazi në operacion.
Objektivat janë goditur në Rripin e Gazës, Liban dhe vende të tjera të Lindjes së Mesme. Raportime të mëparshme kanë pretenduar se rreth dy të tretat e personave të përfshirë në sulmin e 7 tetorit ishin neutralizuar. Megjithatë, një praktikë e pretenduar nga burime palestineze, e raportuar së fundmi nga Asharq Al-Awsat, ka tërhequr vëmendjen. Sipas dëshmive të familjarëve të personave të vrarë, në disa raste objektivave u është dhënë një zgjedhje e rëndë: të largoheshin nga familjet e tyre përpara sulmit ose të qëndronin me to, duke rrezikuar që të vriteshin të gjithë.
Rasti më i fundit i përmendur nga gazeta është ai i Mohammed al-Bayouk, një i ri palestinez që u vra të mërkurën e kaluar nga një dron izraelit, ndërsa ndodhej në çatinë e një ndërtese në një qendër strehimi për personat e zhvendosur, në Khan Younis, në jug të Gazës. Sipas pretendimeve të publikuara, al-Bayouk kishte marrë më herët një telefonatë nga një person që ishte prezantuar si oficer i Shin Bet. Gjatë telefonatës, atij dyshohet se i ishte kërkuar të largohej nga familja dhe të ngjitej në çati, në të kundërt rrezikonte që sulmi të përfshinte edhe të afërmit e tij.
I riu thuhet se zgjodhi të largohej nga familja dhe, sapo mbërriti në çati, u godit nga një raketë e lëshuar prej një droni izraelit. Gazeta saudite shkruan se ka kontaktuar disa familjarë të viktimës, një pjesë e të cilëve kanë refuzuar të komentojnë ngjarjen. Megjithatë, të tjerë kanë konfirmuar versionin e publikuar. Një kushëri i al-Bayouk, i cili pretendon se ndodhej në vendngjarje, ka deklaruar se një nga gratë e familjes u plagos rëndë pasi u përpoq ta ndalonte të riun të largohej i vetëm, pas telefonatës që kishte marrë. Megjithatë, këto pretendime nuk janë verifikuar në mënyrë të pavarur. Sipas burimeve të cituara nga Asharq Al-Awsat, të paktën pesë raste të ngjashme janë regjistruar gjatë tre muajve të fundit në Gaza. Burimet sqarojnë se, ndonëse fillimisht kishin qarkulluar informacione për një numër më të madh incidentesh, verifikimet kanë konfirmuar të paktën pesë raste.
Sipas të njëjtave burime, personat që marrin telefonata të tilla ndihen të detyruar të largohen nga familjet e tyre, me shpresën se kështu do të shmangin vrasjen e të afërmve. Kjo praktikë cilësohet prej tyre si një formë ekzekutimi të synuar dhe presioni psikologjik ndaj anëtarëve të organizatave palestineze. Burimet pretendojnë se rastet e regjistruara kanë të bëjnë me persona të lidhur me aktivitetin ushtarak të organizatave palestineze. Ndërkohë, drejtuesit e lartë dhe komandantët e rëndësishëm, sipas të njëjtave dëshmi, janë goditur pa paralajmërim, përmes sulmeve me raketa dhe dronë, të cilat në disa raste kanë shkaktuar edhe viktima civile.
Pretendimet për kufizimin e viktimave civile dhe roli i SHBA-së
Raportimi ndalet edhe te pretendimet për një ndryshim në mënyrën se si Izraeli po kryen operacionet në Gaza, në kushtet e kritikave të vazhdueshme ndërkombëtare për numrin e lartë të viktimave civile. Sipas burimeve të Asharq Al-Awsat, përdorimi i telefonatave paralajmëruese dhe i dronëve me municione më të vogla mund të lidhet me përpjekjet për të kufizuar atë që Izraeli e cilëson si “dëm kolateral”. Megjithatë, kjo nuk do të thotë se operacionet po kryhen pa pasoja për popullsinë civile.
Në fillim të shtatorit, gazeta izraelite Haaretz raportoi për një mirëkuptim mes Shteteve të Bashkuara dhe Izraelit lidhur me përdorimin e forcës ushtarake në Rripin e Gazës. Sipas këtij raportimi, administrata amerikane ndërhyn në operacionet izraelite vetëm në raste të veçanta, ndërsa presidenti Donald Trump nuk i ka kërkuar kryeministrit Benjamin Netanyahu të kufizojë në mënyrë të përgjithshme veprimet ushtarake në enklavë. Vëmendja e Uashingtonit, sipas Haaretz, është përqendruar kryesisht te rastet kur sulmet shkaktojnë viktima civile.
Megjithatë, burime palestineze të cituara nga gazeta saudite kundërshtojnë pretendimet se numri i viktimave civile është kufizuar. Sipas tyre, sulmet e fundit izraelite kanë shkaktuar vdekje të shumta mes civilëve, si gjatë operacioneve kundër objektivave të caktuara, ashtu edhe për shkak të bombardimeve në zona të banuara. Si shembull, ata përmendin një sulm të së mërkurës në zonën Al-Mawasi, në Khan Younis, ku mbetën të vrarë civilë, punonjës dhe përfaqësues të tregtarëve, pasi u godit një pikë e përdorur nga agjenci qeveritare për monitorimin e lëvizjes së mallrave në Gaza. Dëshmitë e publikuara nga Asharq Al-Awsat mbeten pretendime të burimeve dhe familjarëve palestinezë, të cilat nuk janë konfirmuar në mënyrë të pavarur.
