Prokuroria e Posaçme kundër Korrupsionit dhe Krimit të Organizuar (SPAK) ka realizuar një operacion masiv në kuadër të hetimeve për një organizatë kriminale me bazë në qytetin e Elbasanit. Ky operacion ka synuar evidentimin dhe sekuestrimin e pasurive të paluajtshme dhe të luajtshme të lidhura me aktivitetet kriminale të organizatës, e drejtuar nga vëllezërit Franc dhe Hajdar Çopja
Në hetimet e realizuara, u zbuluan prova që vërtetojnë përdorimin e kriptovalutave nga ana e organizatës për të realizuar pagesa të ndryshme, duke u shtrirë kështu aktiviteti i krimit në një dimension global. Në bashkëpunim me autoritetet ndërkombëtare, përfshirë EUROPOL dhe policitë federale të Belgjikës, Hollandës dhe Spanjës, është bërë i mundur sekuestrimi i kriptovalutave të menaxhuara përmes një platforme të njohur botërore. Vlera totale e kriptovalutave të sekuestruara është më shumë se 10 milionë dollarë amerikanë.
Përveç sekuestrimit të kriptovalutave, janë realizuar dhe sekuestro preventive mbi pasuri të tjera, përfshirë llogari bankare dhe pasuri të paluajtshme të dyshuar për të qenë të lidhura me aktivitetet e paligjshme të grupit. Këto përfshijnë:
Llogari bankare: Dy llogari bankare në emër të individëve të hetuar, me vlerë totale mbi 132,000 Euro.
Pasuri të paluajtshme: Vilat dhe truallin në kompleksin “M. D.”, Farkë, Tiranë, si dhe pasuri të tjera në Tiranë, Kavajë dhe Vlorë.
Asetet e tjera: Njësi shërbimi, lokale komerciale, garazhe dhe apartamente të sekuestruara që kapin vlera të konsiderueshme.
Në përputhje me vendimet gjyqësore të miratuara, veprimet e SPAK dhe BKH kanë çuar në sekuestrimin e pasurive të një sërë individësh të përfshirë në këtë aktivitet kriminal, për të mundësuar hetimet dhe veprime të tjera ligjore për rikthimin e pasurive të sekuestruara në shtet.
Ky operacion i realizuar nga autoritetet shqiptare dhe ndërkombëtare, tregon angazhimin për të luftuar korrupsionin dhe krimin e organizuar dhe shërben si një hap i rëndësishëm në asgjesimin e pasurive të krijuara në mënyrë të paligjshme.
