Xhaxhai i Aleks Nikës paralajmëron zhvillime të forta: Ja çfarë po ndodh me dosjen e ‘21 Janarit’

0
21

Mark Nika, xhaxhai i Aleks Nikës, i cili u vra në protestën e 21 Janarit të vitit 2011, ka hedhur akuza të forta ndaj qeverisë së Sali Berishës. Z.Nika gjatë një interviste për gazetën “SOT”, thotë se komandanti i Gardës nuk ka vrarë me mendjen e tij, por me urdhër nga Sali Berisha. Madje thotë se qeveria e tij në atë kohë ka fshehur provat, i ka prishur serverat, ka mobilizuar gardistët duke i bërë presion Gjykatës së Lartë. Nga ana tjetër, Nika shpreh mosbesimin ndaj Prokurorisë së Tiranës, ku thotë se kjo është dhe arsyeja përse nuk kemi dorëzuar kasetën që posedojnë ku fundoset Sali Berisha, por do e dorëzojnë vetëm kur çështja hetimore të kalojë në SPAK, pas rihapjes së çështjes në Gjykatën e Strasburgut. Ai u shpreh se të akuzuarit i kanë nxjerr vetë justifikimet vetëm që të zvarrisin çështjen e të mos e zbardhin kurrë. Sipas tij, do t’i shkohet ligjërisht deri në fund çështjes së Aleksit.

-Zoti Nika, më 12 mars, Gjykata e Lartë urdhëroi SPAK që të hetojë dosjen e 21 Janarit. Keni informacione nëse SPAK ka nisur hetimet, pasi ju keni edhe një kasetë që ka të bëjë me 21 janarin, a e keni vënë në dispozicion të drejtësisë, dhe a ka fakte dhe prova ajo kasetë?

Akoma nuk kanë zbardhur vendimin, nuk e di se çfarë procedure ndjekin a për shkak të ngarkesës apo për shkak të vështirësisë profesionale. Ne presim kur çështja t’i kalojë SPAK-ut me materialet që do i kalojnë nga Prokuroria dhe denoncimet tona, i bashkëngjit edhe kasetën si provë. Ne nuk e kemi dorëzuar dhe as nuk ia dorëzojmë Prokurorisë së Tiranës, për shkak se nuk mos besimit. Prokuroria ka mbajtur çështjen për 13-14 vite në zvarritje jo për çështje profesionale se nuk janë të paaftë, por për arsye politike. Ajo çështje është e qartë pasi çdo gjë është e regjistruar, e filmuar e gjithë ngjarja, ndërsa merren me një plumb e duke thënë nga doli plumbi. Po ça rëndësie ka nga doli plumbi, se po të mos ishte plumbi nga do ta zgjidhje çështjen Prokuroria e Tiranës. Gjykata e Larta na ka dhënë të drejtë për shkak të denoncimit tonë që kemi bërë, padi për ish-kryeministrin, ministrin e Brendshëm, komandantin e Gardës por edhe për shkak të vendimit të Gjykatës së Strasburgut. Kjo e fundit e ka konsideruar krim shtetëror dhe ka urdhëruar që hetimi të bëhet nga fillimi pasi janë shkelur procedurat, nuk janë pyetur në cilësinë e dëshmitarëve apo personave që kanë dijeni për ngjarjen. Politika e ka mbajtur deri tani të fshehur të vërtetën e ngjarjes duke e zvarritur për 14 vite.

-Po ajo çfarë është hetuar nga Prokuroria e Tiranës, si e vlerësoni?

Prokuroria e Tiranës ka dy arsye për zvarritjen, ose janë të paaftë profesionalisht, ose për arsye politike. E para detyrë e Prokurorisë së Tiranës ka qenë të sjellë dëshmitarë, pse nuk pyet Prokuroria ish-kryeministrin, kryeministrin për çështjen. Ato kanë thënë që ne i kemi vrarë sepse donin të na rrëzonin qeverinë e pushtetin. Unë kam komunikuar me Prokurorinë e Tiranës dhe nxjerrin arsye pas arsye. Ne mendojmë se shteti shqiptar duhej të ishte hetuesi i parë i çështjes. Nuk ishte nevoja që t’i drejtoheshim Strasburgut, pasi dhe atje ka vonesa. Përgjegjësia që në krye të herës të binte mbi shtetin që të merrte përsipër hetimin e çështjes. Shteti shqiptar heshti për 13 vite. Gjykata e Lartë e ka me seriozitet dhe me profesionalizëm hetimin e kësaj çështje, të urdhëroj SPAK-un për t’i shkuar deri në fund çështjes. Vetëm me rinisje të hetimit nga e para, që ne kemi besim se do të bëhet, do të zbardhet ngjarja pa zvarritje.

-Mendoni se shteti ka fshehur prova?

Shteti dhe qeveria e parë, qeveria Berisha i ka fshehur provat, i ka prishur serverat, ka mobilizuar gardistët duke i bërë presion Gjykatës së Lartë. Të gjithë ne familjarët e 21 Janarit shpresën se çështjes do t’i shkohet deri në fund e kemi, i kemi sytë nga SPAK-u. Për ne do të jetë lajm i jashtëzakonshëm marrja e çështjes nga SPAK-u. Gjykata e Lartë dhe e Strasburgut ka hapur dyert për drejtësisë që SPAK për të nisur hetimet.

-A besoni se ka prova që nuk janë zhdukur ende që mund të fundosin Sali Berishën?

Nuk është çështje individuale këtu, ka element të një organizate kriminale pasi janë vrarë me urdhër që Garda të qëllojë me armë kundrejt turmës. Këtë urdhër komandanti i Gardës nuk e merr individualisht, por e merr nga eprori i tij. Ish-Kryeministri dhe ministri i Brendshëm të sqarojnë se kush a urdhrin jo për të mbrojtur, por dhanë urdhër për vrarë për të mbajtur pushtetin. Këtë gjë duhet ta sqarojë Gjykata e drejtësia. Sado që të kenë qenë të kualifikuar vrasësi apo krimineli të përpiqet, do të lërë gjurmë dhe është aftësia e hetuesisë dhe Prokurorisë të gjej ato prova që janë mundur t’i fshijnë ose nuk janë fshirë dot dhe pse janë përpjekur. Ne do jemi në dispozicion të Prokurorisë Speciale që çështjes t’i shkohet deri në fund. Shkuarja e çështjes deri në Gjykatë të Strasburgut është lajm i jashtëzakonshëm për ne familjet e viktimave ajo çështje do të varrosej. Gjykatat dhe Prokuroria kanë punuar me djallëzi pasi e kanë konsideruar si vrasje nga pakujdesia dhe autorët nuk ndiqen më penalisht, prandaj vetëm çështja e Aleksit që është çuar në Strasburg është hapur, ndërsa çështjet e tjera janë të prejardhura pasi janë gjykuar dhe hetuar më parë.

-Cila është thirrja juaj për SPAK-un në lidhje me këtë çështje?

Unë bëj thirrje që çështja të mos zvarritet pasi provat janë evidente, të mos e zvarrisin dhe kalimin e çështjes në SPAK. Me sa kemi ne dijeni, trupa përbërëse e SPAK është profesionale dhe jashtë ndikimeve politike, pavarësisht nga trysnitë që mund të bëj pala e të akuzuarve. Kam bindje që SPAK do ta mbarojë në kohë sa më shpejtë çështjen. Të akuzuarit i kanë nxjerr vetë justifikimet vetëm që të zvarrisin çështjen e të mos e zbardhin kurrë.  Drejtësinë e kërkojmë nga drejtësia, e jo nga qeveria. Zvarritjet janë të pakuptimta pasi kërkojnë që ne të mërzitemi, por jemi të fortë që t’i shkohet deri në fund çështjes së Aleksit ligjërisht.

Intervistoi: Xhoana Vraniçi

LEAVE A REPLY

Please enter your comment!
Please enter your name here