“Kapterr Behari” drama që merret me mënyrën e fabrikimit të jetëve paralele, të fshehta të krijuara te njerëzit e diktaturës

0
36

“Kapterr Behari” shkruar dhe me regji nga Stefan Çapaliku është produksioni më i ri i teatrit Metropol. Premiera këtë mbrëmje vjen për publikun nën interpretimin e aktorëve Ervin Bejleri, Naun Shundi dhe Enisa Hysa. Premiera do të jetë në skenën teatrore në datat 9, 10,11 dhe 12 shtator. Stefan Çapaliku është i njohur me veprat e tij në teatër dhe këtë herë vjen me “Kapterr Behari”, ku teatri i Metropolit shprehet se premiera është pjesë e festivalit “Adriatik” që ka nisur në Tiranë. “Kapterr Behari” ngjitet sonte në skenë dhe teatri Metropol shkruan se është drama që merret eskluzivisht me mënyrën e fabrikimit të jetëve paralele, të fshehta të krijuara te njerëzit e diktaturës. Skenografia është nga Beqo Nanaj, muzika Andi Kongo, kostumografia Frenc Gjerasi dhe koreografia Prek Memaj. Asistent regjisor është Xhino Musollari. Teatri shpjegon se shfaqja ka karakter koncertor, në kuptimin e dy sjelljeve estetike të artistëve në skenë. “Më së pari aktorët luajnë mbi parimet e teatrit epik, duke treguar se kush janë dhe çfarë duan, pra sipas parimeve të Breht. Së dyti ato do komportohen mbi parimet e përfshirjes në ngjarje dhe në rrethanë, mbi parimet e teatrit të Stanisllavskit. Të dyja këto sjellje estetike përmblidhen në një shfaqje minimaliste. Minimalizmi nuk do rrëfehet vetëm në skenografi dhe kostumografi, por edhe në stilin interpretativ. Kjo estetikë e bën shfaqjen kompakte dhe ekspresive”, thuhet në material për premierën. Muzika gjithashtu së bashku me elementet e tjerë të zërit do prodhohet live dhe do përbëjë një aksion të fortë skenik.

Ngjarjet dhe personazhet

Kapterr Behari, përgjegjës për mbarëvajtjen e agjitpropit në burgun e Burrelit i lexon çdo ditë me altoparlant të burgosurve politikë librat e Enver Hoxhës dhe gazetat e ditës. Ndërkaq Pjetri, një i burgosur veteran, i dënuar me 25 vjet burg, ngarkohet herë pas here nga komandanti i burgut të përkthejë materiale top secret për llogari të Komitetit Qendror të Partisë. Për të bërë këtë punë atij i lirohet njëra nga tre qelitë e burgut. I vihet në dispozicion një makinë shkrimi dhe një tufë me letra. Liza, banakierja e klubit të qendrës së qytetit, e pamartuar dhe në sytë e të gjithë meshkujve të qytetit, ngacmon seksualisht kapterr Beharin. Kapterr Behari, kurioz se çfarë është duke përkthyer Pjetri bie në grackën e subjektit romantik të shënimeve të konsullit britanik në Tiranë. Prej asaj kohe toger Behari nis ta përjetojë me mish e me shpirt historinë librore dhe në të njëjtën kohë fillon një jetë paralele, duke u përpjekur që personazhin femëror të shënimeve të konsullit ta projektojë te figura e Lizës. Që prej asaj dite vizitat e kapterr Beharit në qelinë e Pjetrit shpeshtohen aq shumë sa bien në sy edhe të autoriteteve të burgut. Po kështu limitohet koha e leximit të veprave të Enver Hoxhës dhe literaturës tjetër politike. Prej kësaj presioni rritet. kapterr Behari nuk ia del dot ta përballojë represionin dhe një natë vendos të vetëvritet.

PËRGJIGJU

Shkruani komentin tuaj
Vendosni emrin tuaj