Kilian Mbape është sot për sot lojtari i ri më i mirë në botë. Madje ai rivalizon dyshen e famshme Mesi-Ronaldo, si lojtar kualitativ, me peshë në repartin ofensiv të Paris San Zhermenit dhe kombëtares së Francës, por në të njëjtën kohë çmohet nga kompanitë e ndryshme të vlerësimit të futbollistëve në Europë me 300 milionë euro. Nuk është e lehtë të paguash shifra të tilla, por me sa duket Reali i Madridit është gati të bëjë çmenduri për të sjellë në Madrid sulmuesin francez, i cili mund të bëjë diferencën dhe t’i japë Realit një dimension të ri në rivalitetin me skuadrat e tjera të mëdha të kontinentit.
Kjo pasi Mbape është lojtar i së ardhmes dhe e ka provuar këtë në fushën e lojës me skuadrën pariziene. Por ai gjithnjë e më shumë po lakohet si objektiv në merkato prej shumë skuadrave elitare, veçmas nga “Los Blancos”, të cilët dëshirojnë ta marrin në verë. Edhe trajneri Zinedin Zidane është duke tentuar të bëjë çmos për ta bindur që të veshë bluzën e Realit sezonin tjetër dhe Mbape është në rrugë drejt Madridit. Në fakt, “ylli” francez Kilian Mbape është bërë njëri ndër sulmuesit më të kërkuar të botës që kur u transferua nga Monako në Paris San Zhermen në vitin 2018, duke i shënuar 81 gola në sezonet e gjysmë që nga atëherë. Para se të transferohej në Paris San Zhermen, Mbape ishte përfolur shumë për një kalim tek Reali i Madridit. Këto spekulime për shpërnguljen në “Santiago Bernabeu” nuk janë ndalur asnjëherë, që nga atëherë. I lindur në vitin 1998 në Bondi, një lagje e varfër e Parisit, Mbape u rrit në një kohë kur Zidane ishte “superyll” botëror dhe heroi i francezëve.
Në hapjen e shoqatës së tij bamirëse “Inspired by KM”, e cila do t’i ndihmojë fëmijët 9 deri në 16-vjeçarë drejt jetës si të rritur, Mbape u pyet për futbollistët që i kishte adhuruar kur kishte qenë fëmijë. “Epo, unë i kam kaluar disa faza. Sa për fillim, si fëmijë, ishte Zidane. Nëse je djalë dhe je francez, atëherë idhulli yt është Zidane. Pas kësaj ishte Kristiano Ronaldo dhe e kam pasur fatin të luaj kundër tij. Pastaj ishte braziliani Ronaldo për mënyrën se si ai luante. Unë dua ta lë një lloj gjurme të tillë me vlerat e mia, ta lë një mesazh në historinë e futbollit”, theksoi sulmuesi i PSG-së, Kilian Mbape.
Kjo deklaratë e sulmuesit francez i nxiti edhe më shumë spekulimet për një transferim potencial të tij në “Santiago Bernabeu”. Disa orë më vonë, lëvdatat u kthyen sërish drejt tij nga ana e trajnerit Zidane. “Tani, ai është shembulli për të tjerët. Ne jemi shembuj për ata që luajnë futboll. Unë kam qenë shembull sepse disa njerëzve u pëlqente mënyra se si luaja unë”, thekson Zidane. Duhet theksuar, së fundmi, se Kilian Mbape i ka shënuar 21 gola në 22 paraqitjet e tij për PSG-në këtë sezon dhe është në rrugë të drejtë për ta fituar për herë të katërt radhazi titullin e Ligue 1, pasi PSG-ja është lidere e ligës me tetë pikë më shumë sesa Marsejë, që radhitet e dyta.
