Kancelarja gjermane Angela Merkel po kalon disa momente të trishta.
Merkel ka humbur nënën e saj në moshën 90-vjeçare. Vdekja e Herlind Kasner konfirmohet për mediat gjermane nga një burim qeveritar, i cili ka kërkuar që të respektohet privatësia e familjes.
Ajo lindi udhëheqësen e ardhshme botërore në Hamburg në vitin 1954, duke u zhvendosur në ish-Gjermaninë Lindore vetëm disa javë më vonë me vajzën dhe burrin e saj, Horst Kasner, një pastor që vdiq në 2011.
Kancelarja Merkel është tepër e kufizuar kur vjen fjala për të folu r për jetën e saj private, mirëpo në një intervistë të dhënë në 2016-n, ajo ka treguar për marrëdhënien me të ëmën, duke thënë se kishin komunikim të vazhdueshëm përmes telefonit.
Merkel shtoi se nëna e saj ishte shumë e dhënë pas lajmeve dhe gazetave, po bisedat mes tyre fokusoheshin përgjithësisht në tema familjare.
Herlind Kasner deri në vitet ’80 ka punuar si mësuese e Anglishtes dhe Latinishtes, ndërsa më vonë është tërhequr nga jeta aktive.
