Një informacion i marrë në rrugë operative se Klement Balili ndodhet në Shkodër, vuri në lëvizje forcat speciale të cilat u nisën nga Tirana drejt qytetit të veriut tre net më parë.
Rreth 30 trupa nga më të përzgjedhurit të mbështetur nga Policia e Shkodrës, kontrolluan disa lokale në qendër dhe një hotel luksoz. Por nga operacioni nuk pati asnjë rezultat.
Ose informacioni ishte i pasaktë, ose Klement Balili kishte mundur të largohej në kohë derisa forcat speciale të Tiranës nisën aksionin, i tha Tv Klan një burim brenda policisë.
Janë kontrolluar edhe pikat kyçe në segmente ku mendohej se lëvizte Balili, por asgjë nuk u arrit. Sipas të njëjtave burime, informacioni i marrë nga policia thoshte se Klemend Balili ndodhej në Shkodër prej disa ditësh. Aksioni për kapjen e tij u organizua brenda 2 orësh.
43-vjeçari prej më shumë se 2 vitesh vijon arratinë, ndërkohë që mbetet një nga personat më të kërkuar në vend. Balili, i akuzuar për trafik ndërkombëtar droge, në kërkim dhe i dënuar në Greqi, i ka shpëtuar të gjitha operacioneve të organizuara nga policia për kapjen e tij.
Pak ditë më parë ishte vetë Kryeministri Rama që kërkoi arrestimin e Balilit duke e konsideruar si një mosarritje të punës së policisë.
