Aktivistja e njohur, Evi Kokalari ka reaguar ashpër në rrjetet sociale, duke denoncuar publikisht se financuesi kryesor i aktivitetit të kreut të PD, Sali Berishës dhe kreut të PR, Fatmir Mediu në SHBA është biznesmeni Nik (Nazar) Mehmeti. Sipas saj, Mehmeti është pronar i disa klubeve të striptizmit në Teksas dhe drejtues i organizatës “Albanians for America PAC”, përmes së cilës mbulon shpenzimet e udhëtimeve dhe takimeve politike. Kokalari pretendon se paratë nga bizneset e orientuara seksualisht po përdoren për të blerë vëmendjen e politikës amerikane dhe për të ndikuar te kongresmenët si Keith Self, Pete Sessions dhe Joe Wilson.
Ajo ngre dyshime të forta për pastrim parash mes Fatmir Mediut dhe Mehmetit, si dhe për përfitime të dyshimta financiare që shtrihen deri në Maqedoninë e Veriut. Më tej, aktivistja akuzon se ky grup ka marrë peng Grupin Parlamentar për Çështjet Shqiptare në Kongresin Amerikan, duke dëmtuar rëndë imazhin dhe interesat e Shqipërisë. Në reagimin e saj, ajo paralajmëron nisjen e një ekspozimi të plotë të dosjeve sekrete dhe të fotografive nga drekat e darkat politike. Ndërkohë aktivistja Kokalari u ka dhënë ultimatum kongresmenëve amerikanë që të japin dorëheqjen nga grupi i çështjeve shqiptare ose do t’u dërgojë të gjitha informacionet komprometuese kundërshtarëve të tyre politikë. Në fund, ajo ka renditur dokumentet dhe bizneset e Mehmetit në Dallas, duke premtuar se ky denoncim është vetëm fillimi i një loje të hapur.
REAGIMI I PLOTË I AKTIVISTES EVI KOKALARI
“Ja kush e financon Fatmir Mediun dhe të gjitha lidhjet e tij me kongresmenë dhe politikanë në Teksas, si edhe, nëpërmjet tyre, lidhjet me individë si Chris LaCivita, Joe Wilson dhe disa të tjerë. Pjesëmarrja e Berishës, Mediut etj në Konventën e RNC, përveç miratimit të padiskutueshëm të LaCivitës, është mundësuar edhe nga mbulimi i shpenzimeve bazë prej biznesmenit shqiptar, i cili prej vitesh merret me klube striptizmi në Teksas. Edhe pse zakonisht qëndron në prapaskenë dhe nxjerr përpara disa figura nëpërmjet organizatave ‘Albanians for America’ PAC, të cilat pretendojnë se “mbrojnë interesat” e shqiptarëve, diku aty interesat janë ndërthurur aq shumë sa, në të njëjtën kohë, mbrohen edhe interesat e Fatmir Mediut dhe, për pasojë, të Sali Berishës.
Njihuni me Nik (Nazar) Mehmetin, pronarin e disa klubeve të striptizmit në Teksas, mikun e ngushtë të Fatmir Mediut dhe njeriun që financon aktivitetet e tij me kongresmenë si Keith Self, Pete Sessions dhe Joe Wilson, si edhe me Prokurorin e Përgjithshëm të Teksasit, Ken Paxton. Këtu përfshihen edhe vizitat e fundit të Sali Berishës në Teksas. Shikoni fotot më poshtë. Ai është gjithashtu figura kryesore pas “Albanians for America PAC”, një organizatë që ndoshta bën punë të mirë për Kosovën, por prej kohësh dëmton Shqipërinë, pikërisht për shkak të miqësisë shumë të dyshimtë ndërmjet Fatmir Mediut dhe Nik Mehmetit. Është e vështirë të kuptohet se çfarë e lidh një politikan shqiptar me një biznesmen klubesh striptizmi, të cilat, në thelb, mund të konsiderohen si prostitucion i legalizuar, ose siç i cilëson Bashkia e Dallasit, “Sexually Oriented Businesses”.
Lidhjet e dyshuara mes Mediut dhe rrjetit në Teksas
Megjithatë, miqësia e tyre është e hershme, deri në atë pikë sa personalisht dyshoj se Mediu mund të ketë pastruar paratë e tij nëpërmjet klubeve të Mehmetit. Vetëm një partneritet i këtij niveli mund ta shpjegojë besnikërinë jo vetëm të Nik Mehmetit, por edhe të personave që mbahen në biznes ose në rrethet politike pikërisht nëpërmjet tij. Prej kohësh, këtij grupi të komunitetit shqiptar në Teksas i kam kërkuar të mos përfshihet në çështjet e brendshme të Shqipërisë. Ua kam shpjeguar se po shkaktojnë shumë dëm, por nuk më kanë dëgjuar. Kam folur privatisht me disa pjesëtarë të komunitetit në Teksas dhe, megjithëse disa prej tyre dukej qartë se dëshironin të më ndihmonin, e ndieja se kishte diçka që nuk ma thoshin hapur.
Sekreti, pra, është pikërisht Nik Mehmeti dhe biznesi i tij, i cili nuk është aspak diçka për t’u krenuar, as për ne si shqiptarë dhe as për kongresmenët që shoqërohen me këtë grup. Akoma më shqetësues është fakti se asnjëri prej këtyre personave nuk është nga Shqipëria. Ata janë nga Kosova, Maqedonia e Veriut dhe trevat e ish Jugosllavisë. Të gjithë qëndrojnë pas Fatmir Mediut dhe jo vetëm e mbështesin atë nëpërmjet lidhjeve të tyre në Kongres, por krijojnë edhe përshtypjen se mbulojnë pagesat që bëhen në prapaskenë. Edhe Grupi Parlamentar për Çështjet Shqiptare në Kongres është marrë peng nga këta elementë. Në fakt, njëri prej tyre ia prezantoi Chris LaCivitën Sali Berishës dhe grupit të tij, ndërsa Fatmir Mediu fshihet pas kredibilitetit të këtyre kongresmenëve.
