Arrestimi i Ergys Agasit nuk është thjesht një ngjarje e zakonshme e kronikës sonë të përditshme, por një ngjarje jashtëzakonisht e madhe që tregon fijet e fshehta të pushtetit dhe krimit në Shqipëri, u shpreh gazetari investigativ Artan Hoxha.
Në një intervistë për Euro News, ai tha se Agasi nuk është një gangster i formatit standard, por një personazh i veçantë që ka shërbyer si një nga koordinatorët kryesorë midis botës së mbidheshme dhe botës së nëndheshme. Hoxha shpjegoi se ai është koordinatori i tretë radhazi që vjen nga qyteti i Durrësit, një qark ky me rëndësi të jashtëzakonshme politike, ekonomike dhe strategjike që kontrollon portin më të madh të vendit.
Ndryshe nga dy koordinatorët e mëparshëm, të cilët ishin njerëz të pushtetit që lidheshin me krimin, gazetari nënvizoi se rasti i Agasit ishte ndryshe sepse ai bëri lidhjen me pushtetin lart. Fuqia e tij e madhe nuk erdhi sepse ai e fitoi vetë atë, por sepse kjo fuqi iu delegua, pohoi Hoxha.
Ai u bë koordinatori që u propozua nga ata poshtë dhe mori miratimin nga lart, duke u kthyer në njeriun që mund të materializonte kërkesat e krimit të organizuar dhe t’u shërbente nevojave të pushtetit kur kishte fushatë zgjedhore, ashtu siç u vërtetua në vitin 2021 ku ndërhyrja e krimit solli një përmbysje tektonike në Durrës, u shpreh gazetari.
Prapaskenat
Artan Hoxha tregoi se Agasi vinte nga një familje me traditë të njohur të së majtës, ku babai i tij Bardhyl Agasi kishte qenë deputet dhe prefekt i respektuar, por i biri shkoi shumë më larg duke grumbulluar një pushtet të tillë saqë dukej si njeriu i dytë më i fuqishëm në vend pas Edi Ramës. Gazetari sqaroi se ai kishte aq shumë ndikim sa linte pas edhe zëvendëskryeministrat si Arben Ahmetaj apo Belinda Balluku, duke demonstruar kontroll të plotë mbi agjencitë kryesore të vendit si AKSHI, Kadastra dhe instrumente të shërbimeve sekrete.
Hoxha specifikoi se ai nuk ishte një gangster që e mbante peng kryeministrin, por ishte një produkt i fabrikuar që i shërbente atij. Megjithatë, kjo mbështetje filloi të lëkundej pasi gjatë një operacioni të kaluar në qershor për kontrabandën e cigareve u thye paprekshmëria e tij dhe u gjetën dokumente e prova që e kthyen atë në një problem, shpjegoi gazetari.
Ai kishte grumbulluar materiale dhe kishte filmuar zyrtarë të lartë të shtetit, gjyqtarë, prokurorë, drejtorë dhe ministra në situata nga më të paimagjinueshmet, tha Hoxha. Kur këto materiale ranë në duar të gabuara dhe shkuan në SPAK, ai nuk po e kuptonte se ishte kthyer në një rrezik serioz për ata lart, shtoi më tej gazetari.
Arrestimi
Gazetari Artan Hoxha zbuloi se kishte dhjetë muaj që deklaronte se Agasi ndodhej pikërisht në aksin Durrës-Tirana-Elbasan, që është vendi më i sigurt për t’u fshehur nëse ke lidhjet e duhura sepse në të vërtetë nuk po e kërkonte askush. Ai madje tregon se pas daljes së tij të parë ku foli për këtë, mori telefonata nga njerëz që i thoshin se e kishin aty dhe i kërkonin të mos fliste.
Hoxha u shpreh se e kishte paralajmëruar Agasin se kishte vetëm dy rrugë: ose të dorëzohej, ose nëse situata dilte jashtë kontrolli, rrezikonte të eliminohej fizikisht sepse dinte shumë dhe mund të kthehej në një barrë për ata që kishte filmuar.
Me arrestimin e tij, ky kërcënim u eliminua dhe tani Agasi është mbyllur mirë në burg, ku është tërësisht i kontrolluar dhe nuk mund të negociojë më asgjë, deklaroi gazetari. Hoxha kujtoi fjalët e Ahmetajt se në burg njerëzit mund të negociojnë vetëm supën e burgut, ndaj kushdo që pret që ai të bëhet bashkëpunëtor i drejtësisë si Nuredin Dumani thjesht duhet ta harrojë, pasi një dëshmi e tij do të rrëzonte vetë pushtetin, gjë që nuk do të lejohet të ndodhë, pohoi ai.
Aksioni
Prapaskenat e kapjes së tij tregojnë qartë se nuk kemi të bëjmë me një aksion të vërtetë policor, por me atë që Artan Hoxha e quan një arrestim të kontrolluar, duke përdorur termin që policia përdor për shpërthimet e kontrolluara të eksplozivëve.
Ky aksion u kthye në një spektakël të vërtetë mediatik, i filmuar dhe i fotografuar në çdo sekondë e çdo hap për t’u shpërndarë menjëherë në publik, duke shërbyer edhe për të mbuluar kapjen e Beqirit në Francë, u shpreh gazetari. Ndonëse u tha se ai u ndoq dhe u gjurmua, policia e dinte shumë mirë se ku ndodhej, deklaroi Hoxha.
Ajo që bën më shumë përshtypje dhe zbulon të vërtetën është fakti se njeriu më i kërkuar në vend, i cili udhëtonte me një makinë Audi të pablinduar dhe shoqërohej nga ish-nëndrejtori i krimeve Shpatara, nuk u kap nga forcat speciale Renea apo Fast, sqaroi gazetari. Rrugën atij ia preu dhe e bllokoi Nazmiu, i cili është thjesht shoferi i grupit të gatshëm të Durrësit, tregoi Hoxha. Gazetari pyeti me ironi se si ka mundësi që kur ai ishte në Elbasan dhe policia e dinte këtë gjë, nuk ndërhyri atje por e la të bënte gjithë atë rrugë deri te Plepat në Durrës.
Teatri
Sipas Hoxhës, i gjithë ky teatër tregon se Agasi u dorëzua nga ata që po e mbronin, me qëllim që të merrej nën kontroll të plotë dhe të heshtte për gjithçka që di. Ai u dërgua menjëherë në burgun e Bradasheshit në Elbasan, poshtë kombinatit metalurgjik, një lëvizje e pazakontë për arrestimet që bëhen në Tiranë apo Durrës, çka sipas gazetarit vërteton se ky njeri tani duhet të heshtë plotësisht.
Ky arrestim i shërben vetëm politikës sepse Agasi nuk përbënte kërcënim për ata poshtë, por po kërcënonte ata lart me provat e shumta që kishte grumbulluar, tha ai. Hoxha theksoi se në Shqipëri nuk ka një mafie që ka shtetin e vet, por kemi një shtet që ka mafien e vet, ku organizata më e fortë është vetë zyra e kryeministrit dhe krimi i organizuar ende nuk e sheh veten më të fortë se pushteti.
Kjo është arsyeja pse politikanët nuk vriten si në Itali, sepse ekziston një ombrellë e madhe mbrojtëse ku palët bëjnë marrëveshje, por në fund ata që fitojnë gjithmonë janë politikanët, shpjegoi gazetari.
