Saeb Erekat, Sekretari i Përgjithshëm i Organizatës Çlirimtare të Palestinës (PLO), kërcënon se autoritetet palestineze do të ndërpresin lidhjet me “çdo vend që do të zhvendoset ose hapë ambasadën e tij në Jerusalem”.
“Palestina do të ndërpresë marrëdhëniet e saj me çdo vend që do të lëvizë ose hapë ambasadën e saj në Jerusalem. Ne i nxisim të gjitha shtetet e kombeve t’i binden ligjit ndërkombëtar, duke përfshirë rezolutat e këshillit të sigurisë 478 dhe 2334. Shkelja e ligjit ndërkombëtar është një shenjë e dobësisë dhe jo e fuqisë,” shkroi Erekat në Twitter.
“Shkelja më e dukshme e ligjit ndërkombëtar është aneksimi i Jerusalemit Lindor nga Izraeli, dhe çdo njohje e një aneksimi të tillë të paligjshëm në çdo formë nuk është vetëm shkelje flagrante e ligjit ndërkombëtar, por edhe mosrespektim total i statutit të KB dhe rezolutave përkatëse të KB,” shtoi Sekretari i Përgjithshëm, pas arritjes së njohjes së Kosovës nga Izraeli, ku Prishtina zyrtare ka bërë të ditur se do të hapë ambasadën në Jerusalem, kurse Serbia do të zhvendosë ambasadën nga Tel Avivi në Jerusalem, pas nënshkrimit të marrëveshjes në 4 shtator mbi normalizimin e marrëdhënieve ekonomike Kosovë-Serbi, në prani të presidentit të SHBA, Donald Trump.
