Zbehen shpresat e presidentit për të dobësuar Këshillin e Emërimeve në Drejtësi. Meta ka paditur Ardian Dvoranin duke tentuar largimin e tij, ndërkohë që po ashtu sytë janë te Arta Marku, e cila nuk është më Kryeprokurore. Por dje ka dalë një raport që zbeh shpresat e kreut të shtetit. Në një raport rekomandimesh për KED, komisioni i pavarur i monitorimit të organeve të reja të drejtësisë, e bën mjaft të qartë këtë gjë. Asnjë nga anëtarët e KED nuk mund të ndryshojë gjatë gjithë vitit të punës së këtij institucioni. Madje as lista e kandidatëve që duhet të hidhen në short nga Presidenti apo Kuvendi pas publikimit të saj që në 15 nëntor. Raporti i komisionit të monitorimit i është dërguar KED një ditë para mbledhjes së tij të parë. Ky sqarim për rolin e Arta Markut, edhe pse nuk përmendet me emër, u bë pas debatit mediatik se ish-Kryeprokurorja duhej zëvendësuar në KED, për aq kohë sa nuk është më pjesë e Prokurorisë së Përgjithshme. “Përjashtimi nga KED e ndonjë anëtari për shkak se gjatë vitit, në të cilin ushtron veprimtarinë KED-ja, ka ndryshuar pozicioni i anëtarit brenda sistemit të drejtësisë, mund ta vinte KED në kushte pamundësie të ushtrimit të veprimtarisë, sa kohë që të gjithë anëtarët e KED janë pjesë e sistemit të drejtësisë dhe potencialisht të gjithë mund të kenë ndryshime të pozicionit, jo vetëm për shkak të karrierës”, thuhet ndër të tjerash në raportin e rekomandimeve për KED nga komisioni i pavarur i monitorimit të organeve të reja të drejtësisë. Ndërsa Arta Marku u caktua relatore për procedurën e zëvendësimit të Besnik Muçit. KED duhet t’i dërgojë presidentit kandidaturat që duhet të zëvendësojnë anëtarin kushtetues të dorëhequr pak javë pas marrjes së detyrës, pasi u shkarkua nga shkalla e dytë e veting-ut. Pikërisht për procedurat e përzgjedhjes së anëtarëve të kushtetueses dhe kompetencat e vetë anëtarëve të KED-së në këtë përzgjedhje, këshilli i kërkoi Kuvendit qartësim të neneve ligjore. Qëllimi ishte shmangia e konflikteve institucionale si me Presidentin, pas të cilit vetë kryetari Dvorani u kallëzua penalisht.
