Mëngjesin e ditës së sotme, ka ndodhur një shpërthim në një biznes, në Yzberisht të Tiranës. Sipas burimeve shpërthimi ka ardhur nga bombola e gazit.
Nga ngjarja janë zbardhur detaje të reja, gazetarja Dorjana Bezat për “BalkanWeb” tregon momentet e tmerrshme të shpërthimit në byrektore, ku janë lënduar pronarja Ardjana Mesi dhe bashkëpronarja Klodiana Simeci.
Dy të plagosurat janë dërguar menjëherë në spital, ku ndodhen jashtë rrezikut për jetën. Pronarja e byrektores, Ardjana Mesi, ka pësuar lëndime në njërin sy, pasi nga shpërthimi një nga xhamat e thyer i ka depërtuar në sy.
Ndërkohë, bashkëpronarja Klodiana Simeci ka pësuar shembje, pasi forca e shpërthimit e ka rrëzuar në tokë. Në vendngjarje kanë mbërritur edhe forcat zjarrfikëse, të cilat po bëjnë këqyrjen e bombolave të gazit, që ishin me madhësi 20 litra. Ndërkohë, që në vendin e ngjarjes pritet të mbërrijnë edhe ekspertët e ISHTI-it, për të parë nëse bombolat ishin jashtë funksionit.
