Muzeu Historik Kombëtar do t’i nënshtrohet rikonstruksionit fizik si jashtë ashtu edhe brenda mjediseve të tij. Drejtoresha e Instituti të Monumenteve të Kulturës Arta Dollani është shprehur se muzeu ka dëmtime, që ka pësuar nga koha. “Nuk do të ndryshohet asgjë, do të ruhet po e njëjta volumetri, mozaiku gjithashtu do rikonstruktohet me gjithë elementët e tij pra do ketë një rikonstruksion të thellë jo të sipërfaqshëm pasi ka dëmtime që ka pësuar nga koha”, pohon Arta Dollani drejtoresha e Institutit të Monumenteve të Kulturës gjatë një interviste televizive. Sipas saj, ky është momenti i duhur për rikonstruksionin e muzeut pasi dhe gjithë sheshi “Skënderbej” tashmë është i rikonstruktuar. “Një komponent tjetër i rëndësishëm është ekspozita e tij pra linja muzeore që ai ofron. Duhet të kemi një muze të qytetërimit dhe për këtë po punon gjithë grupi i ekspertëve dhe interesante në këtë pikë është mënyra e tregimit të historisë së këtyre pavijoneve. Janë një grup prej 20 ekspertësh që po punojnë për këtë pjesë”, u shpreh Dollani. Më tej drejtoresha e IMK Arta Dollani shton se ajo që do vijë ndryshe në këtë pjesë është heqja e ngarkesës ideologjike, pra, do të ketë orientim tek faktet. “Do paraqiten dokumente historike autentike pra do paraqitet historia me fakte jo më me interpretime”, tha ajo. Sipas Dollanit rikonstruksioni i muzeut do e bëjë atë të jetë i kohës dhe do të ketë elementin e edukimit pra do të jetë një muze i të gjithëve dhe i atyre që vijnë e vizitojnë për të njohur Shqipërinë nëpërmjet këtij muzeu. “Muzeu do të ketë një prezantim ndryshe me platforma dixhitale, me staf i cili shpjegon paraprakisht se çfarë do vizitosh, për çfarë je i interesuar pra do ketë një shumëllojshmëri të programit të muzeut. Kosto e këtij projekti do të ketë një vlerë paraprake deri në 13 milionë euro. Mënyra e ndërhyrjes është menduar me faza në mënyrë që të mos kemi kurrë një mbyllje të plotë të muzeut, pra që ekspozitat dhe pjesa edukuese të vazhdojë”, përfundoi drejtoresha Dollani. Grupi i punës, që punoi për projektin e Muzeut Historik Kombëtar përbëhej nga arkitektët Sokrat Mosko, Enver Faja, Nina Shehu dhe Petraq Kolevica. Salla e lashtësisë u projektua nga arkitektja Nina Shehu, salla e mesjetës, nga arkitekti Enver Faja dhe ajo e socializmit nga arkitekti Petraq Kolevica.
