Gandhi Eisenkot i ka bërë thirrje kryeministrit në largim të Izraelit, Benjamin Netanyahu, të tregojë përmbajtje dhe përgjegjësi në vendimet që lidhen me sigurinë kombëtare, duke ngritur shqetësime për mundësinë e një sulmi të ri ndaj Iranit.
Në një letër të publikuar në rrjetet sociale, Eisenkot, pa e përmendur drejtpërdrejt Republikën Islamike, paralajmëroi se ndërhyrjet e forcave të sigurisë pa një kërcënim të menjëhershëm mund të sjellin pasoja të rënda për demokracinë izraelite dhe besimin e qytetarëve te institucionet.
Reagimi i tij vjen pasi Netanyahu, gjatë betimit të parlamentit të ri më 10 nëntor, foli për një kërcënim ekzistencial nga Irani dhe paralajmëroi se Teherani po punon për të rikthyer kërcënimin bërthamor.
Kryeministri në largim deklaroi gjithashtu se Izraeli mund të përballet së shpejti me presion ndërkombëtar për të pranuar një Iran të pajisur me armë bërthamore.
Në përgjigje, Eisenkot i kërkoi Netanyahut të mos ndërmarrë iniciativa të rrezikshme përpara inaugurimit të qeverisë së re, e cila do të marrë besimin e Knesetit.“Ju kërkoj: Në këtë periudhë të ndjeshme, ju jeni të thirrur të veproni me përgjegjësi kombëtare. Të tregoni përmbajtje dhe kujdes përballë lëvizjeve të rrezikshme që mund të shtyhen derisa të betohet qeveria e re që do të ketë fituar besimin e Knesetit”, shkroi Eisenkot.
Ai paralajmëroi gjithashtu se vendosja e forcave të sigurisë në veprim pa një kërcënim të menjëhershëm mund t’i vendosë drejtuesit e institucioneve të sigurisë në një konflikt kushtetues.
“Mos i vendosni krerët e shërbimeve të sigurisë në një konflikt të vështirë kushtetues ose mos i lini në dyshim për atë që kërkohet prej tyre dhe cila është rruga e duhur e veprimit”, theksoi ai.
Ndërkohë, Netanyahu ka bërë thirrje për krijimin e një qeverie të unitetit kombëtar, duke argumentuar se kërcënimet nga Irani kërkojnë një qëndrim të përbashkët politik dhe institucional.
Në sfondin e këtyre deklaratave mbetet edhe përplasja mes Izraelit, Shteteve të Bashkuara dhe Iranit lidhur me programet bërthamore dhe raketore të Teheranit. Irani, nga ana e tij, ka mohuar vazhdimisht se synon të prodhojë armë bërthamore.
