Hetimet ndaj biznesmenit Ermal Beqiri dhe pasurive të tij në Francë kanë marrë vëmendjen e mediave lokale franceze. “OiseHebdo” i ka kushtuar një shkrim çështjes së Châteaud’Auteuil, kështjellës në Berneuil-en-Bray, duke raportuar se Shqipëria kërkon sekuestrimin e pronës në kuadër të hetimeve ndaj Beqirit.
Media franceze e vendos në qendër pikërisht pronën historike në Oise dhe kërkesën e ardhur nga autoritetet shqiptare. Sipas “OiseHebdo”, çështja e kështjellës lidhet me hetimin që po zhvillohet në Shqipëri ndaj biznesmenit, i cili aktualisht ndodhet në Francë dhe kërkohet të ekstradohet drejt Tiranës.
Châteaud’Auteuil ndodhet në komunën Berneuil-en-Bray, pranë Beauvais. Prona historike është blerë në fund të vitit 2024 për rreth 2.6 milionë euro, një shumë që përputhet me vlerën e kështjellës së identifikuar në Francë nga Prokuroria e Posaçme gjatë hetimit pasuror.
Châteaud’Auteuil
Sipas të dhënave publike franceze për transaksionet e pasurive të paluajtshme, shitja është regjistruar më 30 dhjetor 2024 me një vlerë prej 2.612.200 eurosh. Kështjella ka një sipërfaqe të konsiderueshme dhe pjesë të saj kanë statusin e monumentit historik në Francë.
Shkrimi i “OiseHebdo” sjell kështu në vëmendjen e publikut francez një prej pasurive më të kushtueshme që autoritetet shqiptare kanë identifikuar gjatë hetimeve ndaj Beqirit. SPAK ka bërë të ditur më herët se, përveç një kështjelle me vlerë rreth 2.6 milionë euro, në Francë janë identifikuar llogari bankare me mbi 2 milionë euro, dy apartamente dhe mjete motorike.
“Shqipëria po kërkon ekstradimin e tij në mënyrë që ai të gjykohet edhe në vendin e tij të origjinës. Ai po ndiqet penalisht atje nga Zyra e Prokurorit Kombëtar kundër Korrupsionit (SPAK) dhe dyshohet për përfshirje në një rrjet kriminal. Ndërsa procedurat janë në vazhdim, ai mbetet në paraburgim.
Por kjo çështje ka një lidhje me rajonin Oise të Francës. Siç tregohet në një deklaratë nga autoritetet shqiptare, Shqipëria ka kërkuar sekuestrimin e aseteve të tij në Francë, në pritje të gjyqit të tij. Midis këtyre aseteve është ” një kështjellë në Oise, në veri të Parisit “, e cila thuhet se është blerë për afërsisht 2.6 milionë euro. Kjo kështjellë është Châteaud’Auteuil , në Berneuil-en-Bray”, thuhet në shkrim.
Për këto pasuri, autoritetet shqiptare kanë kërkuar bashkëpunimin e drejtësisë franceze për vendosjen e masave të sekuestros. Në këtë fazë bëhet fjalë për një kërkesë të autoriteteve shqiptare dhe jo për një vendim përfundimtar konfiskimi nga drejtësia franceze.“Kjo kështjellë madhështore me tulla të kuqe, e vendosur larg fshatit Berneuil-en-Bray, ka ofruar qëndrime “të jashtëzakonshme” me mëngjes dhe bujtje për disa vite.
Në faqen e saj të internetit, institucioni drejtohet nga çifti Darondeau-de La Pintière, të cilët e blenë pronën në vitin 2003 dhe i kushtuan vite restaurimit të saj. Nuk përmendet asnjë lidhje me Ermal Beqirin. Emri i tij gjendet vetëm në njoftimet ligjore të faqes së internetit. E gjithë prona duket se i përket atij, një fakt i konfirmuar nga kryetari i ri i bashkisë, SimonMuller.Kur u kontaktua me telefon në kështjellë, personi në fjalë nuk u prit mirë.
Një grua shumë e këndshme u përgjigj. Por kur iu shpjegua arsyeja e telefonatës, ajo u përgjigj me mirësjellje: “Nuk mund t’ju përgjigjem”. Edhe kur iu kërkua thjesht të konfirmonte nëse Ermal Beqiri ishte pronari i kështjellës? ” Më vjen keq, nuk mund t’ju përgjigjem, kalofshi një mbrëmje të mbarë”, përsëriti ajo. Në fshat, duket se ka shumë pak lidhje midis pronarit të kështjellës dhe pjesës tjetër të komunitetit.
Kryetari i bashkisë SimonMuller, i cili ka qenë në detyrë që nga marsi, beson se e ka takuar vetëm një herë, krejtësisht rastësisht. Prandaj, për momentin, është e vështirë të thuhet nëse sekuestrimi i mundshëm i kësaj ” pasurie me origjinë kriminale ” do të ketë pasoja për fshatin”, thuhet më tej.Ermal Beqiri ndodhet në Francë që prej arrestimit të tij në fund të korrikut.
Ai ra fillimisht në duart e autoriteteve franceze pas një incidenti ajror, kur pilotoi një avion të vogël në një zonë të ndaluar pranë centralit bërthamor të Penly-t. Gjatë procedurave u konstatua se ndaj tij kishte një kërkim të lëshuar nga autoritetet shqiptare.Beqiri kërkoi të lirohej nga paraburgimi, por kërkesa e tij u rrëzua nga drejtësia franceze. Ndërkohë, Shqipëria ka përcjellë dokumentacionin për ekstradimin e tij dhe ai vijon të mbahet në Francë në pritje të vendimmarrjes për këtë procedurë.
Në Shqipëri, emri i Beqirit lidhet me hetimin e SPAK për procedurat e prokurimit të Agjencisë Kombëtare të Shoqërisë së Informacionit, AKSHI. Prokuroria e Posaçme ka ngritur dyshime për një sërë veprash penale në kuadër të kësaj dosjeje, ndërsa hetimet përfshijnë edhe gjurmimin e pasurive që dyshohet se lidhen me aktivitetin e hetuar.
Pikërisht ky hetim pasuror e ka çuar dosjen deri në Francë, ku tashmë edhe media e zonës ku ndodhet Châteaud’Auteuil po raporton për kërkesën e Shqipërisë. Çështja pritet të ketë dy zhvillime të rëndësishme në drejtësinë franceze: fatin e kërkesës për sekuestrimin e pasurive dhe vendimin për ekstradimin e Ermal Beqirit drejt Shqipërisë.
