Një grabitje spektakolare ka tronditur një nga muzetë më të njohur të Vjenës, ku dy persona kanë arritur të vjedhin një gjerdan platini të zbukuruar me 673 diamante, me një vlerë prej disa milionë dollarësh.
Ngjarja ndodhi të enjten pasdite, gjatë orarit të vizitave, në Muzeun e Arteve të Aplikuara (MAK) në kryeqytetin austriak.
Sipas policisë, dy autorët kishin blerë bileta dhe kishin hyrë në muze si vizitorë të zakonshëm. Në një moment, ata thyen me çekiç një vitrinë prej xhami dhe morën gjerdanin, përpara se të largoheshin në këmbë.
Të dyshuarit nuk kishin mbuluar fytyrat dhe janë filmuar nga kamerat e sigurisë së muzeut. Policia austriake ka publikuar pamjet e tyre dhe ka nisur një operacion kërkimi në Vjenë, duke angazhuar edhe një qen gjurmues.
“Autorët u larguan me bizhuterinë në një drejtim të panjohur”, deklaroi policia, ndërsa u ka bërë apel qytetarëve për çdo informacion që mund të çojë në identifikimin dhe kapjen e tyre.
Bëhet fjalë për një prej objekteve më të veçanta të ekspozitës së bizhuterive të Van Cleef & Arpels, e cila ishte hapur në muze që prej muajit qershor.
Gjerdani është prej platini dhe përmban 673 diamante, me një peshë totale prej rreth 200 karatësh. Ai dikur i përkiste Nazli, mbretëreshës bashkëshorte të Egjiptit.
Sipas dokumentacionit të ekspozitës, mbretëresha e kishte mbajtur gjerdanin në vitin 1939, në dasmën e vajzës së saj Fawzia me princin e atëhershëm të kurorës së Iranit, Mohammad Reza Pahlavi, i cili më vonë u bë shah i Iranit.
Gjerdani u shit nga shtëpia e ankandeve Sotheby’s në Nju Jork në vitin 2015 për 4.3 milionë dollarë.
Ekspozita në MAK përfshinte qindra objekte të rralla nga historia 120-vjeçare e shtëpisë së famshme franceze të bizhuterive Van Cleef & Arpels, si dhe pjesë nga koleksioni i vetë muzeut.
Nga grabitja nuk pati të lënduar, megjithëse në sallë ndodheshin disa persona në momentin e ngjarjes. Pas vjedhjes, ekspozita u mbyll përkohësisht dhe një tur i planifikuar për pasditen e së premtes u anulua. Ekspozita ishte parashikuar të qëndronte e hapur deri më 27 shtator.
Vjedhja në Vjenë i shtohet një serie grabitjesh të bujshme që kanë goditur institucionet kulturore në Evropë. Vetëm gjatë muajve të fundit, objekte me vlerë të madhe janë grabitur në muze në Francë, Itali dhe Spanjë.
Në tetor të vitit të kaluar, grabitësit hynë gjatë ditës në Luvër, në Paris, dhe u larguan brenda pak minutash me bizhuteri të kurorës me vlerë rreth 88 milionë euro.
Ndërkohë, një raport i fundit i Europol ka ngritur shqetësimin për rritjen e dhunës gjatë grabitjeve të muzeve në Evropë. Autorët, sipas raportit, po përdorin gjithnjë e më shpesh armë, çekiçë të mëdhenj, sëpata dhe madje edhe eksplozivë për të arritur te objektet e çmuara.
