SHBA paralajmëron tërmet në Shqipëri e Ballkan, hap letrat për milionat e investuara në kompanitë “off shore”, të rrezikuar dhjetëra politikanë

0
252

Shtetet e Bashkuara të Amerikës pritet të nisin reprezaljen në radhët e pushtetarëve shqiptarë. Shpallja “non grata” e ish-kryeministrit Sali Berisha nuk do të jetë vendimi i vetëm, pasi pas tij do të ketë dhe shumë politikanë të tjerë. Paralajmërimi ka ardhur dje nga Uashingtoni. Zv.Ndihmës Sekretari Amerikan i Shtetit dhe i dërguari special për Ballkanin, Gabriel Escobar, në një intervistë për Zërin e Amerikës në gjuhën serbe ka paralajmëruar se do të ketë të tjerë emra “non grata” në Ballkan. Escobar tha, se SHBA janë të përkushtuar në luftën kundër korrupsionit në Ballkan dhe se sipas tij, një nga mjetet në këtë luftë janë sanksionet, ndërsa vijoi më tej duke thënë se sanksionet kanë efekt dhe se do të ketë edhe të tjera. Por ai paralajmëroi se do të ketë masa ndaj të gjithë kompanive “off shore”, pas të cilave fshihen zyrtarë e politikanë. “Nuk mund dhe nuk dua të komentoj detajet. Dhe nuk mund të flas për detajet e angazhimit tonë diplomatik me njerëz të ndryshëm në rajon. Mund t’ju them se sanksionet i pengojnë njerëzit të transferojnë para. Ato parandalojnë dhe çojnë në mbylljen e kompanive “off shore” përmes të cilave transferohen paratë, veçanërisht fondet publike, përmes proceseve jo transparente që përfitojnë shumë pak njerëz”, tha ai. Nëse ndodh kjo, do penalizohen shumë pushtetarë në Shqipëri. Ministra, ish-ministra, deputetë dhe funksionarë të tjerë dihet që kanë investuar në kompani “off shore”. Në disa skandale si “Panama Papers” apo “Pandora Papers” janë përfolur se ka politikanë dhe emra të lidhur me politikanë dhe një veprim nga SHBA do sillte furtunë në Shqipëri. Escobar shtoi, se ato sanksione nuk kanë për qëllim vende apo popuj të caktuar, por siç tha ai, individë që janë thellësisht të përfshirë në korrupsion. “Sanksionet nuk janë mjeti kryesor i angazhimit të SHBA-së në rajon, megjithatë kjo administratë është shumë e përkushtuar në luftën kundër korrupsionit dhe një nga mjetet në këtë luftë janë këto sanksione. Dhe mund të them po, do të ketë më shumë sanksione, por ky nuk do të jetë mjeti kryesor i angazhimit tonë. Ata synojnë individë që janë thellësisht të përfshirë në korrupsion”, tha ai. Escobar, teksa u pyet lidhur me efektin që do të kenë sanksionet, ai tha se do të kenë shumë efekt. Ai theksoi, se sanksionet do të pengojnë njerëzit e korruptuar që të transferojnë para.

Reagon Yuri Kim

Nga ana tjetër po dje, reagoi edhe ambasadorja Yuri Kim. Ajo ka përcjellë një mesazh nga Martin Luther King, i cili luftoi në Shtetet e Bashkuara të Amerikës kundër racizmit dhe refuzoi dhunën politike. Kim është shprehur, se duhet të vijojë të na frymëzojë trashëgimia e tij dhe duket se ky është një mesazh për skenat e dhunës së 8 janarit përpara selisë blu nga mbështetësit e ish-kryeministrit Sali Berisha. “Dr. Martin Luther King, Jr. nderohet në Shtetet e Bashkuara të Amerikës dhe në mbarë botën jo vetëm për përpjekjet e tij për drejtësi dhe barazi për të gjithë, por edhe për refuzimin e dhunës politike. Le të vazhdojë të na frymëzojë trashëgimia e tij”, tha ajo. Qëndrimi i saj duket se ishte një mesazh për dhunën e 8 janarit. Ndërkohë, edhe më herët ambasadorja Yuri Kim ka reaguar lidhur me dhunën në protestën para selisë së Partisë së Demokratike që u organizuan nga ish-kryeministrit Sali Berisha e cila tha, se ata që do të nxisin dhunë duhet që të mbajnë përgjegjësi.

LEAVE A REPLY

Please enter your comment!
Please enter your name here