Atletika Botërore mori një lajm sensacional gjatë garave të mitingut ndërkombëtar të sallave të mbyllura në Madrid. Kështu, atleti amerikan Grant Hollouej thyen rekordin botëror të garës së 60 metrave me pengesa. 23-vjeçari nga Shtetet e Bashkuara e ndali kronometrin në 7”29, duke u bërë në këtë mënyrë edhe i pari atlet në historinë e “mbretëreshës së sporteve”, që zbret poshtë kohës 7”30 në garën më të shkurtër me pengesa, në aktivitetet indoor. Bie kështu një ndër rekordet më të vjetër në historinë e këtij sporti në salla të mbyllura, rekord i cili i përkiste atletit të famshëm britanik Kolin Xhekson. Sprinteri amerikan ishte duke përjetuar një formë të shkëlqyer, madje dy javë më herët, pikërisht më datën 9 shkurt në Lievin të Francës 23-vjeçari nga Virxhinia fiksoi kohën e dytë më të shpejtë në garën e 60 metrave me pengesa në garat indoor. Suksesi më i madh në karrierë për atletin nga Shtetet e Bashkuara përpara këtij rekordi ishte medalja e artë në kampionatin e fundit botëror, që u zhvillua në Katar dy vjet më parë, në Khalifa International Stadium të Dohas, ku Grant Hollouej mposhti rusin Sergei Shubenkov dhe francezin Paskal Martinot–Lagarde, për të ndalur kronometrin në kohën 13”10. Këtë herë gjithçka u arrit në Mitingun e Madridit, në salla të mbyllura në “Ëorld Indoor Tour”, ku Grant Hollouej fluturoi për të fiksuar kohën rekord 7”29. Në vendin e dytë u rendit kampioni I botës në salla të mbyllura, atleti britanik Andrju Pozi me kohën personale më të shpejtë të sezonit 7”51. Rekordi I vjetër në garën e 60 metrave me pengesa në salla të mbyllura ishte vendosur në marsin e vitit të largët 1994 nga ish-atleti i famshëm uellsian Collin Jackson me kohën 7”30. Fillimisht në garat kualifikuese sprinteri nga Shtetet e Bashkuara mbeti vetëm 0,02” larg rekordit 27-vjeçar të atletit të mirënjohur britanik, megjithatë 23-vjeçari duket se e kishte ruajtur më të mirën pikërisht për në finalen e madhe. Përveç shpërblimit prej 20.000 dollarësh për titullin kampion në “World Indoor Tour” fituesit e çdo disipline përfitojnë edhe një ftesë për hyrjen e drejtpërdrejtë në kampionatin e ardhshëm botëror të sallave të mbyllura, që do të zhvillohet vitin tjetër në Beograd. Grant Hollouej garon në disiplinat e 60, 60 metrave me pengesa, 110 metrave me pengesa, kërcim së gjati si dhe në garën e stafetës në 400 metra. Në garën klasike të 110 metrave me pengesa në ambiente të hapura rekordi botëror 12”80 siç dihet mbahet nga bashkëkombasi i tij Aries Merrit, që është vendosur në shtatorin e vitit 2012 në Bruksel, ndërsa Grant Hollouej krenohet në këtë disiplinë me kohën e 18 më të shpejtë të gjitha kohërave, 12”98, të regjistruar në Teksas në Austin afërsisht 21 muaj më parë. Një tjetër aktivitet i rëndësishëm i sallave të mbyllura do të startojë pikërisht në Europë javën e ardhshme, bëhet fjalë për kampionatin evropian të sallave të mbyllura, që do të zhvillohet nga data 4-7 mars në Qytetin e Torunit, në Poloni. Edhe atje, amerikani Hollouej do të tentojë një rezultat të madh në 60 m me pengesa.
