Filmi “Shija e derrit” do të shënojë premierën në edicionin e 18 të “Tirana International Film Festival”, që në 19 shtator shënoi hapjen e tij. “Shija e derrit”, me skenar shkruar nga Elvis Lule dhe Erenik Beqiri dhe me regji nga Elvis Lule është në konkurrim në “Tirana International Film Festival” (TIFF) dhe shfaqet në ditën e katërt të programit të festivalit më datë 22 shtator. Me regji nga Elvis Lule, ky film i metrazhit të shkurtër sjell në role aktorët Lulzim Zeqja, Arta Selimi dhe Artan Islami. TIFF 2020 me drejtor artistik Agron Domi ka nisur prej disa ditësh në Tiranë, duke sjellë për publikun prodhime të ndryshme të kinemasë së huaj dhe asaj shqiptare. Këtë vit në TIFF nga 220 filma që marrin pjesë vetëm 108 janë në garë për çmimet e festivalit, në edicionin e 18. Filmi “Shija e derrit” ka në fokus të tij individin dhe regjisori Elvis Lule i pyetur për skenarin më herët ka treguar se për këtë bashkëpunim falenderon edhe mikun e tij Erenik Beqiri. “Pasi disa qëndrime artistike krijojnë një pjekje të caktuar, pas këtij procesi këto qëndrime socialo- artistike fillojnë të kompozohen në një strukturë letrare dhe pas një procesi filtrues erdhëm në këtë skenar të shkurtër, i cili në fokusin e tij ka individin, gjej rastin të falënderoj mikun dhe bashkëpunëtorin tim Erenik Beqiri”, pohon regjisori Elvis Lule, për filmin “Shija e derrit”. Filmi ka në role aktorë që janë emra të njohur për publikun me rolet e tyre jo vetëm në skenat teatrore në vendin tonë, por dhe me role të ndryshme në kinematografinë shqiptare. Por sa i takon roleve në filmin “Shija e derrit”, regjisori Lule për aktorët thotë se në proceset e kompozimit të një skenari bazohesh mbi një personazh real për të ndërtuar një figurë artistike. Sipas tij, në këtë rast kështu ndodhi edhe me mikun e tij Lulzim Zeqja, ishte hera e parë në këtë bashkëpunim shumë të mirë me Arta Selimin, Artan Islamin dhe zbulimin e një djali të vogël, por me një të ardhme brilante Juri Zeneli. Në aktivitetin e tij Elvis Lule vazhdon punën me kinematografinë, por dhe me teatrin. Në lidhje me angazhimet e tij në jetën artistike, ai ka treguar se fokusi këto vitet e fundit është më tepër te skenari dhe prodhimet audio vizuale.
“Shija e derrit” dhe realizimi
Filmi “Shija e derrit” me regji nga Elvis Lule, që do të shënojë premierën në TIFF trajton një histori dramatike, të një familjeje të shtresës së ulët provinciale shqiptare. Një familje, e cila edhe pse e gjendur në kushte të vështira ekonomike, vendos që të mos dorëzohet përpara skamjes. Ky film i metrazhit të shkurtër është një bashkëpunim mes Element Studios, Kube Studios dhe Qendrës Kombëtare të Kinematografisë, si bashkë prodhues në këtë produkt kinematografik. Në një reagim të tij më parë si regjisor Elvis Lule tregoi se premiera e filmit “Shija e derrit” ishte menduar në fundin e muajit mars të këtij, por për shkak të situatës në të cilën ndodhej vendi kjo ishte e pamundur më parë. Festivali i këtij viti TIFF 2020 u hap me filmin “Liqeni im”, me skenar dhe regji nga Gjergj Xhuvani te amfiteatri i Tiranës, ndërsa në mbrëmjen e fundit do të mbyllet me “Willow” ( Shelgu) të Milcho Manchevski-t, në datën 25 shtator. “Tirana International Film Festival” (TIFF) është eventi më i rëndësishëm kinematografik, që zhvillohet në Shqipëri jo vetëm për nga vjetërsia dhe eksperienca, por edhe për numrin e madh të aplikimeve, aftësinë selektive të filmave, programit të pasur, zbulimeve interesante dhe premierave të filmave më të rëndësishëm në tregun kinematografik sot në botë.
