Avokat Spartak Ngjela ka komentuar dje situatën politike në vend, ndërsa një thirrje ka rezervuar edhe për Parlamentin. Përmes një statusi në rrjetet sociale, Ngjela kërkoi nga Parlamenti që të nisë punën për dy çështje, sikundër është shkarkimi i Presidentit Ilir Meta me motivin se ka kryer shkelje kushtetuese dhe dhënien e “dritës jeshile” për fillimin nga puna të Strukturës së Posaçme Anti-Korrupsion. Ai thekson se opozita parlamentare, me bekimin e Perëndimit, ka potencial të bëhet pjesë në implementimin e reformës në drejtësi. “Na duhet të theksojmë se gjithçka do të varet nga skema që do të përdorë politika amerikane si forcë për shpejtimin e vënies në veprim të reformës në drejtësi. Kjo sepse tani gjithçka është afër kurorëzimit të reformës, por edhe reaksioni antireformë mendohet të jetë i madh. Prandaj, gjithçka do të varet nga dora e parlamentit, dhe këtu duhet të spikasë opozita e re parlamentare. Opozita jashtëparlamentare tani, edhe pse ende ka vullnet kundërshtues anti-reformë, nuk ka forcë se nuk është më në Parlament. Prandaj, përfundimisht, na duhet të theksojmë se gjendja reformuese e Shqipërisë sot duket se mban me vete dy lëvizje që varen nga funksionimi normal i Parlamentit: shkarkimi i Presidentit Ilir Meta, sa më shpejt që të jetë e mundur; dhe, fillimi normal i SPAK-ut.- sa më shpejt! E pra, pikërisht në këto dy pika vjen dhe qëndron edhe opozita e re për të dhënë ndihmesën e saj”, deklaroi ai. Më tej, Ngjela deklaroi se reforma në drejtësi do të hyjë në fuqi falë përkrahjes nga Shtetet e Bashkuara të Amerikës dhe opozitës parlamentare, e cila sipas tij, nuk është e korruptuar. “Opozita aktuale, 90 për qind të së cilës kuptohet se e ka strukturuar politika perëndimore, po pritet të sjellë risi me vlerë kombëtare në Parlamentin shqiptar. Në funksion të reformës, kjo opozitë, nga ekspertët perëndimorë mendohet se e garanton ecurinë e projektit të ngritjes së SPAK- ut, por këtu del kjo pyetje: A do të jetë në gjendje që opozita aktuale në Parlamentin shqiptar të ngrihet në rangun e një opozite të theksit kombëtar e perëndimor? Pikërisht kjo pritet të ndodhë, prandaj mendojmë se do ta kemi tani një opozitë të tillë. Dhe, ne mendojmë gjithashtu, që do të ndodhë, sepse është domosdoshmëri. Është domosdoshmëri për Shqipërinë, sepse vetëm me forcën e kësaj opozite të re parlamentare dhe me forcën e politikës amerikane, mazhoranca aktuale nuk do të këtë mundësi që të lëvizë drejt bllokimit të reformës, ndonëse mendohet se do të jetë e nxitur kundër reformës nga liderët e saj që i kap antikorrupsioni”, nënvizoi Ngjela.
