Rustem Murrja është shqiptari i parë në Turqi, i cili ka aplikuar për dokumente biometrike në Konsullatën shqiptare në Stamboll, një nga gjashtë zyrat e reja që janë hapur në përfaqësitë diplomatike jashtë vendit.
“Për herë parë në 30 vite nga emigrantë ndjehemi qytetarë”, është shprehur Murrja.
Konsullja e Përgjithshme në Stamboll, Blerta Kazdadej tha se fillimi i shërbimit për pajisje me pasaportë dhe kartë identiteti për shqiptarët rezidentë në Turqi ky është një premtim i mbajtur ndaj qytetarëve.
Në ditën e parë të procesit të aplikimit ishin të pranishëm Zëvendësministri i Punëve të Jashtme, Agron Tare dhe Drejtori i ALEAT Jean- Alain JOUAN.
“I ftojmë të gjithë qytetarët të aplikojnë në portalin E-Albania duke ndjekur gjithë udhëzimet e nevojshme në portal”, shprehet konsullja.
Në nëntor të vitit të shkuar Ministria e Brendshme e Shqipërisë bëri të ditur se hapen gjashtë zyra të reja për aplikimin e dokumenteve biometrike jashtë vendit, duke e çuar në total në mbarë botën në 14 të tilla.
Zyrat e reja të aplikimit hapen pranë Konsullatës në Bari, Itali, si dhe Ambasadave Shqiptare në Vjenë, Austri; në Paris, Francë; në Berlin, Gjermani; në Stokholm, Suedi dhe në Stamboll, Turqi.
