Dy persona kanë mbetur të vrarë me armë zjarri mbrëmjen e së shtunës në kryeqytet.
Ngjarja ka ndodhur në zonën e ‘Astirit’, ku persona të paidentifikuar kanë qëlluar me breshëri drejt një automjeti tip ‘Audi A7’. Për pasojë kanë mbetur të vrarë drejtuesi i automjetit dhe pasagjeri.
Hetuesit kanë hedhur dyshime se kemi të bëjnë me një ngjarje të mirëorganizuar dhe vrasësit kanë qenë profesionist, ku e kishin të qartë objektivin. Edhe pse mjetet ishin në lëvizje, pothuajse të gjithë plumbat që janë zbarazur nga armët e tyre kanë kapur automjetin “Audi”. Për këtë shkak hetuesit kanë hedhur dyshime se kemi të bëjmë me një grup vrasësish me pagesë. Të paktën 6 persona kanë marrë pjesë në krimin e rëndë, ku secili ka pasur rolin e tij. Hetuesit kanë sekuestruar dhjetëra kamera sigurie, e po punojnë për identifikimin e autorëve, ku ka dyshime se autorët që ishin në automjetin “Toyota” informoheshin për lëvizjet e Mihasit dhe Dumanit.
Ndërkohë burime nga grupi hetimor dyshojnë se brenda mjetit që u gjet i djegur në Thumanë, ishin 3 persona, shoferi dhe dy të tjerë që kanë qëlluar drejt audit të bardhë. Gjithashtu të paktën 2 persona të tjerë i kanë ndihmuar ato, për ti larguar nga Thumana, ku autorët dogjën edhe automjetin që përdorën gjatë krimit. 32-vjeçari Mihasi, emri i të cilit ishte mjaft i njohur për drejtësinë, pasi ishte përfshirë në disa ngjarje të rënda kriminale dyshohet se ishte objektivi kryesor i atentatit me dy viktima.
Kujtojmë se rreth 2 orë pas ngjarjes në zonën e Thumanës është gjendur një makinë e djegur plotësisht, e cila dyshohet se është e autorëve të vrasjes.
Brenda makinës janë gjendur edhe 2 kallashnikovë, armë me të cilat dyshohet se u krye atentati me 2 të vrarë në zonën e Astirit.
Targat e mjetit ‘Toyota’, që u gjet i djegur janë AA 532 ON dhe rezultojnë të vjedhura në Tiranë.
Ndërsa përplasja mes grupeve kriminale dhe larja e hesapeve mes tyre është pista kryesore që janë përqendruar hetimet për zbardhjen e ngjarjes së rëndë.
Deri me tani, për tu marre ne pyetje në komisariatin e Tiranës, janë shoqëruar 15 persona, ndërsa nuk ka asnjë të dyshuar.
