Ministri për Evropën dhe Punët e Jashtme, Ditmir Bushati deklaroi ditën e djeshme se pagat për diplomatët, por edhe të gjithë njerëzit që punojnë në Shërbimin e Jashtëm do të pësojnë një rritje me 20% gjatë vitit të ardhshëm. Bushati ishte dje i pranishëm në Komisionin për Integrimin Evropian për të diskutuar parimisht projektligjin
“Për buxhetin e shtetit 2019” për Ministrinë e Jashtme. Midis të tjerash, Ditmir Bushati theksoi se buxheti për Ministrinë e Jashtme është 3% më i lartë se ai i vitit 2018. Sipas tij, qeveria ka vendosur për herë të parë për të bërë një rritje cilësore në lidhje me pagat dhe me vlerën e buxhetit në total sepse pretendon të marrë drejtimin e OSBE gjatë vitit 2020.
“Fakti që ka një rritje të ndjeshme këtë vit nga vitet e tjera, pra 20% paga e diplomatëve dhe punonjësve të Shërbimit të Jashtëm dhe 3% rritje në total të buxhetit, ka të bëjë më objektivin tonë për të marrë drejtimin e OSBE në vitin 2020 dhe në rast se do të ketë konsensus, Shqipëria automatikisht përshihet në Trojkën e drejtimit të OSBE-së dhe kjo është arsyeja që pse në 2019-ën, në buxhetin e shtetit është parashikuar një fond specifik për aktivitetet që do të ndërmarrë Shqipëria gjatë vitit 2019. Deri tani përgjithësisht ne kemi qenë konsumatorë, jo thjeshtë të prezencës tonë në OSBE”, tha Ditmir Bushati.
Sipas, ministrit të Jashtëm, ky buxhet mbështet konsolidimin e mëtejshëm të reformave të ndërmarra që promovojnë rritjen ekonomike, punësimin, përmirësimin e cilësisë së shërbimeve ndaj qytetarit dhe procesin e integrimit në Bashkimin Evropian. “Në planifikimin e investimeve publike për vitin 2019 janë mbajtur gjithashtu në konsideratë prioritetet e integrimit evropian. Prioriteti i qeverisë Shqiptare për vitin 2019 vazhdon të jetë hapja e negociatave për anëtarësimin e Shqipërisë në Bashkimin Evropian. Në kuadër të mbështetjes së procesit të integrimit të vendit në BE, projektbuxheti i vitit 2019, parashikon mbështetjen e veprimtarisë së Ministrisë për Evropën dhe Punët e Jashtme dhe të strukturave të tjera të administratës publike shqiptare që do të angazhohen në procesin “screening”, nënvizoi ministri Ditmir Bushati.
