Tensioni shpërtheu jo vetëm gjatë ndeshjes, por edhe pas saj. Marrëdhënia mes Massimiliano Allegri dhe Cesc Fàbregas duket se ka arritur pikën e thyerjes, pas një serie incidentesh që kulmuan me përjashtime dhe deklarata thumbuese para mediave.
Në fushë, përplasja nisi pas një episodi që përfshiu trajnerin e Como 1907 dhe lojtarin e AC Milan, Alexis Saelemaekers. Fabregas kërkoi kartonin e dytë të verdhë për belgun – që gjyqtari nuk e akordoi – dhe më pas ndërhyri duke e penguar, çka bllokoi kundërsulmin e Milanit. Ky veprim ndezi menjëherë situatën: stolat u përfshinë në debat, ndërsa asistenti i Allegrit, Landucci, u drejtua me nervozizëm drejt një lojtari të Comos.
Gjyqtari Mariani ndërhyri për të rivendosur qetësinë, por jo para se të përjashtonte si Allegrin ashtu edhe trajnerin e Comos.
Por episodi në fushë ishte vetëm fillimi. Shkëndijat vazhduan edhe në korridoret që të çojnë drejt sallës së konferencave për shtyp, ku Allegri dhe Fabregas u përballën sërish. Më pas, përplasja kaloi edhe në deklaratat publike.
Fabregas kërkoi falje për veprimin e tij: “Bëra diçka për të cilën nuk jam krenar, një gjest josportiv. Ne fituam topin, por e preka pak nga emocionet. Siç tha Chivu ditën tjetër: mbajini duart në shtëpi, sidomos trajnerët. Nuk mund ta bëjmë këtë. Shpresoj të mos ndodhë më.”
Nga ana tjetër, Allegri reagoi me ironi dhe kritikë: “A kërkoi falje? E kuptoj. Atëherë herën tjetër, nëse dikush shkon drejt vijës së finishit, do të futem edhe unë. Shkova për të mbrojtur Saelemaekers. Lojtari reagoi dhe dikush nga Como erdhi drejt meje. Nuk e di kush ishte, por asgjë nuk ndodhi. Në fushë duhet respekt për gjyqtarin dhe për kundërshtarin. Ai është një trajner shumë i ri. I uroj të fitojë shumë, sepse ka cilësitë për ta bërë.”
