Zona arkeologjike në fshatin Lin të Pogradecit, si dhe zonat arkeologjike në qytetin e Shkodrës apo dhe në Vlorë u përfshinë një ditë më parë në vendimet, që mori këshilli i ministrave. Këshilli i ministrave vendosi një ditë më parë deklarimin “Pasuri kulturore” të zonës arkeologjike nënujore të vendbanimit palafit të fshatit Lin në Pogradec. Në mbledhjen e radhës nga qeveria u miratua po ashtu zonifikimi i zonës arkeologjike nënujore “A” të vendbanimit palafit të fshatit Lin në Pogradec, sipas hartës dhe koordinatave në Kornizën Referuese Gjeodezike Shqiptare (KRGJSH), si dhe plani për ruajtjen, mbrojtjen dhe administrimin e kësaj zone.
Po ashtu në mbledhjen e së mërkurës u miratua edhe deklarimi “Pasuri kulturore e paluajtshme” e dy zonave arkeologjike (“A” dhe “B”) të qytetit të Shkodrës. Bashkë me zonifikimin e këtyre zonave arkeologjike sipas koordinatave dhe hartave të zonifikimit në Kornizën Referuese Gjeodezike Shqiptare (KRGJSH) u miratua edhe plani për ruajtjen, mbrojtjen dhe administrimin e tyre. “Pasuri kulturore e paluajtshme” u deklaruan po ashtu edhe dy zonave arkeologjike (“A” dhe “B”) në qytetin e Vlorës, për të cilat u miratua po ashtu edhe plani për ruajtjen, mbrojtjen dhe administrimin e tyre.
Këto vendime që mori këshilli i ministrave në mbledhjen e radhës për disa zona arkeologjike në vend hyjnë në fuqi pas botimit në “Fletoren zyrtare”. Rezultatet e gërmimeve mbi 4 vjeçare të arkeologëve shqiptarë dhe atyre të universitetit të Bernës një vit më parë konfirmuan se vendbamimi palafit i Linit në Pogradec është më i vjetri në Europë.
