Ashtu siç ndodhi pas tërmetit të 21 shtatorit kur në disa media online u shpërnda qëllimisht një lajm i rremë ku thuhej se një tërmet apokaliptik do të trondiste vendin, edhe sot ka nisur të qarkullojë një lajm i tillë.
Një audio-fake në italisht, që qarkullon në ëhatsup dhe në mediat sociale po shkakton alarm në Durrës. Zëri i një burri që flet italishte të përsosur i bën të ditur një personi imagjinar i cili banon në Durrës se duhet të largohet nga katet e sipërme të banesave, pasi, “sipas ushtarakëve”, një tjetër tërmet “gjatë natës” mund të shkaktojë ne Durrës shumë dëme “për shkak të shiut”.
Ambasada Italiane në Tiranë ka reaguar pas audio-fake dhe thotë se në lidhje me tërmetin në Shqipëri referimi duhet të bëhet vetëm te autoritetet shqiptare dhe selia diplomatike italiane në Tiranë duke u kërkuar qytetarëve që të mos marrin si të vërtetë lajmin që po qarkullon në rrjetet sociale.
Audioja qarkullon që nga dita e djeshme dhe parashikimi-fake i referohej natës së mbrëmshme, gjatë së cilës nuk u regjistrua asnjë tërmet i fuqishëm. Por lajmi u shpërnda vetëm sot dhe, ndonëse ishte “i skaduar”, sikurse ndodh në të tilla raste po shpërndahet në mënyrë virale, duke shpërthyer një alarm krejtësisht pa baza.
