Bruno Shllaku dërgon në Stokholm dramën “Baca jem … u kry amaneti” për Kosovën dhe Çamërinë

0
513

 Shfaqja “Baca jem … u kry amaneti” me regji nga Bruno Shllaku shfaqet premierë mbrëmjen e stome në Stokholm, Suedi. “Baca jem…u kry amaneti” vjen e përshtatur në skenën e teatrit mbi krijimtarinë e dy autorëve të njohur Ali Podrimja dhe Din Mehmeti. Me në kastë aktorësh të njohur nga Shkodra, por dhe nga Durrësi regjisori Bruno Shllaku sjell këtë premierë, që përcjell jo pak mesazhe për publikun. Një vepër, që i takon teatrit poetik, pjesë e saj është Kosova por shfaqja trajton edhe çështjen e Çamërisë. Regjisor dhe aktor në këtë dramë Bruno Shllaku tregon se edhe pse vjen si një teatër poetik brenda saj janë të miksuar të gjitha komponentët e dramës në skenë. “Vepra është e  bazuar në veprat e Ali Podrimjes dhe Din Mehmetit si dhe në disa krijime të miat përmbi Kosovën. Një shfaqje e teatrit poetik, por jo në varg. Është gjithmonë në prozë. Është e miksuar me të gjitha kompromiset e komponentët e mundshme, që ka një dramë. Është gjithçka që aktori është përballë aktorit, që nuk poetikon, por dialogun me vargun e poezisë pa u dëgjuar fare vargu apo rima”, tregon Shllaku. Sipas tij shfaqja nis në atë moment kur shqiptarët po shuheshin nga inekzistenca e tyre. “Është një shfaqje që e fillon nga pika zero, në momente kur shqiptarët ishin pothuajse inekzistent dhe vazhdon deri në momentin kur vërtetë inekzistenca e tyre po shkon drejt shuarjes dhe atëherë ata tubohen. Me fuqinë e tyre si patriotike ashtu dhe dashurisë për mëmëdheun apo dhe asaj të copëtuar padrejtësisht nga fuqitë e mëdha fillon tubimi dalëngadalë deri në shpërthimin e revoltës së përgjithshme dhe unifikimin e të qenurit ushtar i UÇK. Kur krijohet UÇK është një gjeje regjisoriale, që në momentin që janë duke u tubuar të gjithë shqiptarët me një shall të kuq që i rrethon kullat dhe shpirtin e tyre aty dëgjohet zëri i atëhershëm i presidenti Rugova, që shpall Kosovën republikë. Por kjo vjen shumë bukur, që diçka po lind” tregon ai. Me rëndësi në këtë shfaqje sipas regjisorit vjen edhe çështja çame, një plagë e pambyllur. “Me shpalljen e Kosovës republikë fillon një epokë e re, dhe që plaga e saj disi është e mbyllur, sepse e mori të drejtën e saj. Por një plagë tjetër është Çamëria. Një interpret nga salla thotë që unë do të protestoj, sepse çështja çame është inekzistente. Thuhet thotë se dhe për Kosovën ishte çështje inekztistente, por që nuk ndodhi kështu sepse shqiptarët u tubuan. Mbyllet shfaqja me plagën e pambyllur të problemit çam”, tregon regjisori.

Vepra me mesazhin në skenë

Vepra do të jetë tre net në skenën e Stokholmit, në datat 15, 16 dhe 17 shkurt, për të vijuar më pas dhe një tur në skenat e Shqipërisë. Rolet në vepër interpretohen nga Bruno Shllaku, Mimoza Marjanaku, Gjergj Doçi, Dana Xhaj, Gjovalin Kola dhe Megi Kola. Si regjisor Bruno Shllaku shprehet se në premierë do të jetë i pranishëm dhe ambasadori i Shqipërisë në Suedi. “Tre net shfaqja do të jetë në Stokholm dhe më pas shfaqja do të jetë në skenat në Shqipëri. Në Suedi na pret dhe miku im ambasadori Virgjil Kule, që do të jetë dhe prezent në teatrin e Stokholmit. Mesazhi në vepër është për ti thënë shqiptarëve, që sytë duhet të kthehen gjithmonë dhe të mbahen të ngrohta të gjitha marrëdhëniet që ka njeriu me atdheun”, tregon regjisori Shllaku. Në aktivitetin e tij artistik Bruno Shllaku është një emër i njohur dhe i vlerësuar ndër vite me teatrin dhe kinemanë. Roli i tij i parë do të jetë ai në dramën “Gjaku i Arbërit” e Fadil Krajës me regji të Artistit të Popullit, Serafin Fanku. Më tej do të vazhdonin role të tjera si në dramat “Çështja e Blertës”, “Gjenerali i ushtrisë së vdekur”, “Hetimi” etj. Me pjesën “Mirandolina” të Goldonit do të marrë pjesë në Festivalin Mbarëkombëtar të Aktrimit “Apollon 2005” të zhvilluar në qytetin e Fierit në vitin 2005. Të shumta janë dhe rolet që Bruno Shllaku ka interpretuar edhe në kinematografi./Julia VRAPI

LEAVE A REPLY

Please enter your comment!
Please enter your name here