Gjykata e Lezhës ka urdhëruar bllokimin e një llogarie bankare me vlerë 5.2 milionë euro.
Po kështu 7 apartamente në Lezhë dhe 3 në Tiranë janë vendosur nën sekuestro pasi dyshohet se janë blerë me para që ka ardhur nga aktiviteti kriminal.
Pronarja e gjithë kësaj pasurie është një grua. Mësohet se bëhet fjalë për 50-vjeçaren Shqipe Palaj, e cila ka një pasuri prej 5.2 milionë euro dhe 10 apartamente në pronësi bashkë me një 83-vjeçar.
Të dy të moshuarit nuk i justifikojnë dot shumat e konsiderueshme dhe dyshohet se emrat e tyre janë përdorur vetëm për të fshehur orgjinën e parave.
Për këtë arsye këto pasuri janë bllokuar nën akuzën e pastrimit të parave.
Në media flitet se paratë dhe apartamentet u përkasin një të afërmi të të moshuarve që jeton jashtë Shqipërisë, por emri i tij mbahet sekret.
Njoftimi i plotë i Policisë:
Në kuadër të operacionit “Forca e Ligjit”, sekuestrohen rreth 5.2 mln euro llogari bankare dhe pasuri të paluajtshme të dy shtetasve, të dyshuara të përfituara nga veprimtari kriminale Sekuestrot janë rezultat i punës hetimore të Policisë së Lezhës që ka referuar materialet procedurale mbi bazën e dyshimit të arsyeshëm, për përfitimin e tyre nga veprimtaria kriminale, me Prokurorinë e Rrethit Gjyqësor Lezhë. Prokuroria ka filluar procedimin penal për veprën “Pastrim i produkteve të veprës penale ose të veprimtarisë kriminale” në ngarkim të dy shtetasve, duke e finalizuar me sekuestro të vendosur nga Gjykata e Shkallës Parë Lezhë me vendim te datës 23 janar 2019. Sekuestrot janë llogari bankare në vlerë totale mbi 5.2 milione euro dhe 7 apartamente.
