Statistikat janë të rëndësishme sidomos për individët, e veçmas kur këta individë janë të niveleve të larta. Mesi, Ronaldo, Benzema e shumë të tjerë po zëvendësohen nga një brez më i ri por që ka talent, u spikat për momentin Kilian Mbape, që është në kulmin e vet, por edhe talente si Lamine Jamal etj, që sapo kanë filluar ta shtrojnë rrugën e tyre të suksesit. Ndërkohë, Reali i Madridit siguroi fitoren e parë në Greqi falë një spektakli të pastër nga Kilian Mbape, i cili shënoi katër golat në triumfin dramatik 4-3 ndaj Olimpiakos, në ndeshjen e pestë të fazës së grupeve të Champions League 2025/26. “Ylli” francez, që vinte pas tre ndeshjesh pa gol, udhëhoqi “Los Blancos” drejt një fitoreje vendimtare, duke pasur mbështetje nga Vinicius Jr. dhe Arda Güler, por ishte ai që mori gjithë vëmendjen me paraqitjen e tij të jashtëzakonshme.
Falë këtij performimi magjik, 26-vjeçari u shpall “Lojtari i Javës”, duke lënë pas Vitinjën e PSG-së, Aubamejangun e Marsejës dhe Guirasin e Dortmundit. Me katër golat e tij, Mbape iu bashkua legjendave të Realit të Madridit – Kristiano Ronaldo, Ferenc Pushkash dhe Alfredo Di Stefano – si një nga lojtarët që kanë shënuar katër ose më shumë gola në një ndeshje të vetme të Champions League. Ai është tani golashënuesi më i mirë i kompeticionit me 9 gola, si dhe lider i golave në La Liga, duke e çuar totalin e këtij sezoni në 22 realizime. Një formë e frikshme që po tërheq edhe një herë vëmendjen e Europës drejt tij. Ndërkohë, faza e grupeve të Ligës së Kampionëve po hyn në fazën vendimtare, me vetëm tre ndeshje të mbetura dhe renditje surprizuese.
Sipas parashikimeve të superkompjuterit të Opta-s, Arsenal kryeson listën për kualifikimin direkt në 1/8-tën, duke lënë pas Bajernin e Mynihut dhe Paris San Zhermenin. Real Madridi ngjitet në vendin e katërt pas fitores ndaj Olimpiakos, ndërsa Inter dhe Mançester Siti zënë respektivisht vendet e 5-të dhe 6-të. Çelsi dhe Borusia Dortmund plotësojnë tetëshen e kualifikuar direkt. Ndërkohë, klube si Atletiko Madrid, Liverpul dhe Barcelona duhet të luftojnë në fazën “play-off”, ndërsa Athletic Bilbao, Benfika, Vilareal dhe Ajaks duket se do të mbeten jashtë. Futbollistët dhe tifozët e klubeve të mëdha po ndjekin me kujdes çdo ndeshje, ndërsa beteja për 1/8-tën premton emocione deri në minutën e fundit. Champions më i ndjekur dhe i rëndësishëm është ai i fazës së pranverës kur nis eliminimi direkt i ekipeve të mëdha.