Ndërsa fundi i vitit afrohet, kriza energjetike e shtrëngon Serbinë. Rusia dhe SHBA-të, me sa duket, po bëhen gjithnjë e më të paduruara, dhe vendi ballkanik kërcënohet me vështirësi në furnizimin me naftë ose gaz, ose me të dyja.
Pavarësisht shumë pritjeve se do të ketë një vonesë të re, sanksionet u vendosën ndaj Industrisë së Naftës së Serbisë (NIS) javën e kaluar.
Sanksionet ndaj NIS u vendosën nga Departamenti i Financave i SHBA-së dhe do të ndikojnë si te qytetarët ashtu edhe te ekonomia, dhe zgjidhja nuk duket në horizont për momentin, ndërsa sipas shumë vlerësimeve, rezervat e Serbisë do të zgjasin në rastin më të mirë deri në fund të vitit.
Arsyeja për sanksionet, sipas shpjegimeve zyrtare, është pjesa ruse në pronësinë e NIS, dhe problemi për Serbinë është se rusët janë pronarët kryesorë të kësaj kompanie.
Deri në fund të vitit 2025, duket se Serbia do të duhet të zgjidhë disa çështje të mëdha, sepse ndërkohë është shfaqur një problem tjetër. Në vend të marrëveshjes afatgjatë siç ishte rënë dakord, rusët i ofruan Serbisë një kontratë për furnizimin me gaz deri në Vitin e Ri, gjë që u konfirmua nga Presidenti i Serbisë, Aleksandar Vuçiç.
“Pse deri në Vitin e Ri? Logjika është e thjeshtë. Ata duan të na thonë, nëse filloni të shtetëzoni NIS, ne mund ta ndërpresim gazin më 31 dhjetor. Dhe ky është një mesazh shumë i keq për mua”, tha Vuçiç për Informer Television.
Pra, e gjithë situata nga pikëpamja e energjisë duket sikur Serbia është e detyruar të zgjedhë midis naftës dhe gazit dhe ka disa muaj për ta bërë këtë. Nëse e shikoni nga një perspektivë më e gjerë, nga një këndvështrim politik, duket se Serbia tani duhet të vendosë midis Rusisë dhe SHBA-së.