“Nata Kulturore Epidamn” rikthehet këtë herë nën muret e Kullës Veneciane në qyteti e Durrësit. Këtë mbrëmje do të ketë projeksione historike mbi muret e kullës Veneciane; performancë live “Ekuilibër” me Hang, didgerido & isopolifoni; solo violonçeli; Quilling art – Kulla Veneciane në letër; “Kronikat e Kullës”- tregime që sjellin në jetë legjendat e Durrësit. “Mos e humb mundësinë të shohësh Kullën Veneciane të shndërrohet në skenë arti!”, thuhet në njoftimin për këtë natë kulturore. Ky aktivitet realizohet nga Durrësi Aktiv në bashkëpunim me MuZEH Lab dhe Qendra Muzeore Durrës në kuadër të programit “EU4Culture Albania”, financuar nga European Union in Albania dhe zbatuar nga UNOPS Albania në partneritet me Ministrinë e Ekonomisë, Kulturës dhe Inovacionit (MEKI).
Kulla Veneciane në Durrës u restaurua pas dëmtimeve, që pësoi nga tërmeti i 26 nëntorit i vitit 2019. Tashmë ky monument kulture është shndërruar në një qendër informuese për historinë e qytetit. Vizitorët shqiptarë e të huaj, e mbi të gjitha të rinjtë mund të marrin aty informacion për të gjitha objektet me rëndësi historike e kulturore të Durrësit. Kulla është pjesë e kalasë Bizantine të Durrësit, e cila në mesjetë konsiderohet si një nga fortesat më të fuqishme të bregut perëndimor të Adriatikut. Në gjysmën e parë të shekullit XV kur Durrësi ishte nën pushtimin e Venedikut, kulla u rindërtua dhe mori pamjen e sotme. Kulla ka formë rrethore me diametër të jashtëm 9 metra dhe lartësi 9.6 metra.