Jetesa në kompleksin rezidencial ekskluziv të Moskës Scarlet Sails dhe lëvizja e shoqëruar nga një numër i madh rojesh sigurie nuk e mbrojti 46-vjeçarin, Armen Sarkisyan.
Themeluesi i batalionit ArBat humbi këmbën e majtë dhe humbi jetën pasi u përfshi në një sulm me bombë që sipas raportimeve fillestare la dy të vdekur dhe pesë të plagosur.
I pari që e pranoi ishte ish-këshilltari i Putinit, Sergei Markov: “Sulmet e Ukrainës po i afrohen gjithnjë e më shumë elitës ruse”.
Pajisja shpërtheu në hollin e ndërtesës elegante në rrugën Avjatsionnaya, në veri-perëndim të Moskës.
Ndoshta e fshehur në një divan në holl dhe më pas e aktivizuar nga distanca teksa Sarkisjan dhe shoqëruesi i tij po dilnin nga ashensori.
I lidhur me familjen e ish-presidentit të arratisur Viktor Yanukovich dhe në krye të “titushki” (provokatorëve) që në vitin 2014 përplaseshin me rebelët e Euromaidanit, për Kievin, Sarkisjan do të ishte një bos i botës së krimit në Republikën Popullore të Donetskut, i njohur me emrin “Gorlovskij”.
Ai ishte kreu i Federatës së Boksit të Rajonit Donetsk, si dhe qendrës së stërvitjes ushtarake Gorlovka. Prandaj pseudonimi.
Në shtator 2022, ai themeloi një njësi të forcave speciale të quajtur ArBat, Batalion Armen: një grup i lëvizshëm i trupave sulmuese nën komandën e mercenarit të atëhershëm të Wagner, Ajk Gasparjan, i njohur me emrin e luftës si Arbek.
Pas tentativës së rebelimit të Wagnerit të udhëhequr nga i ndjeri Yevgeny Prigozhin, ArBat ishte dërguar në ushtri si pjesë e brigadës ndërkombëtare “Pjatnashka” dhe aktualisht ishte i angazhuar në zmbrapsjen e ukrainasve nga rajoni jugor rus i Kurskut.
Nga shpërthimi raportohet se u plagos një nga personat në eskortë: Nënkolonel i Ministrisë së Brendshme, Oleg Kaspirovich, 49 vjeç, me origjinë nga Krimea, i pranishëm në bazën e të dhënave ukrainase “Mitotvorets” që publikon të dhënat e atyre që sipas autorëve, dyshohet se janë të përfshirë në “krime kundër themeleve të sigurisë kombëtare të Ukrainës”.
