Gazetari Fatos Mahmutaj, komentoi protestën e fundit të opozitës që degjeneroi në dhunë dhe përplasje në Tiranë. Sipas tij, u bllokuan qytetarët për hallet personale të Berishës me SPAK dhe DASH. Mahmutaj renditi krimet e Berishës pasi ky i fundit mashtroi me incidentin që i ndodhi deputetit demokrat Agron Gjekmarkaj. Pamjet treguan se deputeti nuk është dhunuar nga policia, por nga ana tjetër persona të dyshimtë duket se e kanë shtyrë. Sali Berisha nxitoi duke akuzuar policinë dhe Edi Ramën për një akt kriminal ndaj Gjekmarkajt.
Gazetari Fatos Mahmutaj tha se gjithë këto vite Berisha ka mashtruar, ashtu si me ngjarjen e Gërdecit, por edhe për 21 janarin, ku vetë Mahmutaj mbeti i plagosur. “Sali Berisha nuk njihte baxhanakun e vetë në Gërdec. Nuk e ka herën e parë që gënjen Berisha. Jo në një rast, por edhe në dhjetëra të tjera raste Berisha ka gënjyer. Më kujtohet kur shpërtheu Gërdeci ne gazetarët u ndamë nëpër shumë institucione. Disa merreshin me pjesën e spitaleve, ku ishin të plagosurit. Disa me pjesën e Prokurorisë, apo edhe policisë. Pra gazetarët u vendosën në dispozicion të kësaj ngjarje të rëndë.
Radha ime ishte të shkoja të pasqyroja kronikën nga spitali “Nënë Tereza” ku mbërritën të plagosurit e parë. Në ato momente aty mbërriti dhe Berisha dhe nuk e pati problem hiç të gënjente që të mashtronte se ishte një kompani amerikane që bëri shpërthimin e Gërdecit. Pra Berisha nuk e ka për turp të gënjejë. Nuk është hera e parë. Unë kam dhe rastin tim Berishën që ka gënjyer në konferencë shtypi në 21 janar. Ai doli dhe tha se flitet se ka një telekronist të plagosur, por mos i besoni se Edvin Kristaq Rama e bën për të përhapur panik. Më pas u shpreh se telekronisti në fillim tha se jam plagosur, pastaj deklaroi se e shtynë protestuesit. Ky ishte një skandal”, u shpreh Mahmutaj në Abc Neës.
Vrasja e Azem Hajdarit
Gjithashtu Fatos Mahmutaj ka folur edhe për prapaskenat e vrasjes së liderit të dhjetorit ’90 Azem Hajdarit. Ai nuk ngurron të akuzojë Berishën për këtë ekzekutim. “Azem Hajdarin nuk e futi në kurth Berisha. Ai e nxori për ta vrarë aty. Pse Berisha nuk e dërgoi asnjëherë incizimin e badigardit të Azem Hajdarit? Pra e incizoi atë me diktofon dhe asnjëherë nuk e nxori. Berisha ka futur në kurth shumë prej njerëzve të tij dhe jo një. Në protestat që ka bërë Berisha që pas ’97 dhe deri më sot ka patur disa herë të vrarë. Këto vrasje asnjëherë nuk janë zbardhur. Berisha i vriste. Akuzonte shtetin, Fatos Nanon. Derisa në vitin 2004 gjeti rastin e asaj gomones së 9 janarit dhe me të i la të vrarët Berisha dhe filloi protestat mbi bazën e asaj gomones që u mbyt në Karaburun. Dhe në rastin e Gjekmarakajt ky ishte skenari i tij. Mashtrim dhe dhunë. Vetëm këtë gjë di të bëjë Berisha”, tha ai.
SPAK t’i kërkojë SHBA dosjen e “non-gratës” që mban emrin e Berishës
Sipas gazetarit, institucionet e drejtësisë shqiptare duhet t’i kërkojnë SHBA dosjen që vulosi non grata-n e Berishës, dhe të bëjnë atë që maqedonasit bënë për pak orë me rastin e Artan Grubit. “Kjo nuk ka anë e udhë. Që të bllokohen qytetarët për hallet personale të Berishës me SPAK dhe DASH. Sali Berishës nuk ia heq hallin e tij personal, non gratën, edhe sikur të bllokojë të gjitha rrugët e Shqipërisë. DASH nuk ia heq non gratën. Berisha është non grata dhe i mbetet SPAK dhe institucionet ligjzbatuese t’i kërkojnë SHBA dosjen për të cilën e shpallën non grata. Të bëjnë minimalisht atë që maqedonasit e bënë brenda 12 orësh. Është vendim me prova, dosje e kopsitur mirë dhe për këtë shkak Berishës i është plotësuar dosja, dhe më pas është shpallur non grata. Shteti shqiptar duhet të kërkojë dosjen amerikane dhe SHBA do të ketë vullnetin dhe të dërgojë dosjen. Berisha të shkojë atje ku e ka vendin”, u shpreh Mahmutaj për “Abc News”.