Analisti Olsi Jazexhi ka këshilluar dje ish-presidentin Ilir Meta dhe Monika Kryemadhin të largohen sa më parë drejt Moskës apo Teheranit, sepse vetëm ato dy mund ta mbrojnë nga amerikanët. Jazexhi njihet për qëndrimet e tij dhe duket se është i sinqertë në këshillën që u jep çiftit Meta-Kryemadhi, pasi sipas tij, SPAK ka prerë letrat për Ilir Metën dhe Monika Kryemadhin. “Tani që SPAK ka prerë letrat për Ilir Metën dhe Monika Kryemadhin, Ilir Meta duhet që urgjentisht të largohet nga Shqipëria për në Moske apo Teheran. Nëse nuk ka mundësi të bëjë këtë, duhet te shkoj ne ambasadën ruse dhe urgjentisht te kërkojë strehim politik, përndryshe amerikanet do e kalbin në burg sikur Hashim Thaçin dhe Kadri Veselin. Nga amerikanet vetëm Teherani dhe Moska të mbrojnë”, shkruan Jazexhi. E njëjta gjë mund të thuhet edhe për Sali Berishën
SPAK “qep” letrat për çiftin Meta-Kryemadhi
Vitet e fundit Meta e ka krahasuar veten me Mic Sokolin, Vojo Kushin, Mujo Ulqinakun etj., por mbetet për t’u parë se sa trim është kur të dalë urdhri i arrestit, pasi Meta nuk ka as imunitet. Ilir Meta akuzohet se ka shpenzuar gjatë viteve 2016-2017 rreth 1.2 milionë USD për lobim në Shtetet e Bashkuara të Amerikës. Meta nuk ka deklaruar asgjë në ILDKPKI dhe në KQZ siç e parashikon ligji. Në bazë të provave të mbledhura, në qershor të vitit 2022, ish deputeti Halit Valteri referoi një kallëzim në SPAK. Në kallëzimin penal thuhej se Ilir Meta dhe Monika Kryemadhi kanë konsumuar 8 vepra penale, si fshehje të ardhurash, korrupsion pasiv dhe aktiv, pastrim parash, shpërdorim detyre, fshehje pasuri, mospagim taksash etj. Si fakte, në kallëzim thuhet se Ilir Meta dhe LSI-ja kanë lidhur kontrata lobimi në SHBA me kompaninë McKeon Group në vitin 2017, me vlerë qindra mijëra dollarë, duke fshehur shpenzimet si në KQZ, ashtu edhe në ILDKPKI, siç e parashikon ligji. Disa ditë më pas, bazuar në këtë kallëzim, SPAK regjistroi procedimin penal me numër 122, me dy akuza: Korrupsion dhe falsifikim të formularëve. Prokurorët e kësaj çështje janë Sotir Kllapi dhe ish kreu i SPAK-ut, Arben Kraja, të cilin Meta e etiketoi si ‘Spurdhjaku i partisë që ka vendosur t’i shërbejë hapur mafies së inceneratorëve’. Për të provuar veprën penale të dyshuar, SPAK kërkoi informacion me letërporosi në SHBA. Autoritetet amerikane, në përgjigjen e kthyer, kanë konfirmuar pagesat e paligjshme për lobim. Kjo përgjigje fundos Ilir Metën dhe Monika Kryemadhin, të cilët duhet të zgjedhin se cili duhet të shkojë në burg. Kur SPAK mori në pyetje Ilir Metën, ky i fundit ia la përgjegjësinë Monika Kryemadhit, Petrit Vasilit dhe Endrit Braimllarit. Por, Vasili dhe Braimllari kanë pohuar në SPAK se ata nuk kanë lidhje me lobimin, as nuk kanë parë dhe as nuk kanë lëvizur para. Nga provat e mbledhura, Ilir Meta është identifikuar si koka e lobimit me para të pista. Meta e ka udhëhequr këtë veprimtari të paligjshme edhe kur ishte president.
Pasuri të tjera
Nga ana tjetër, SPAK ka gjetur të tjera dokumente që fundosin edhe më shumë çiftin më të akuzuar për korrupsion. Ishte gazetari Adriatik Doçi, i cili zbardhi së fundmi dokumentet që tregojnë se si Monika Kryemadhi dhe Ilir Meta kanë kamufluar pasuritë në emër të familjarëve të tyre. Duke komentuar në rrjetet sociale hetimet e SPAK, Doçi shprehet se familja e Kryemadhit zotëron pasuri nga Sauku deri në Lalëz. Gazetari ka nxjerrë dokumentet nga Kadastra, që tregojnë se familjarët e Kryemadhit zotërojnë 17 pasuri të paluajtshme. Po ashtu edhe i ati i Ilir Metës zotëron pasuri të patundshme. Sipas tij, Monika Kryemadhi është aksionere edhe në disa pasuri, të cilat nuk i ka deklaruar në ILDKPKI. “Ilir Meta dhe Monika Kryemadhi kanë kamufluar një pasuri me vlerë miliona euro nga Sauku, zona përballë TEG, Rruga e Elbasanit, Mëzez deri në Gjirin e Lalzit, në emrin e Fatime Kryemadhit (nëna e Monikës), Drini Kryemadhi (vëllai i Monës), Rexhep Metaj (babai i Metës). Edhe pse si të ardhura të ligjshme kanë dy pensione dhe një pagë si inxhinier, tre të afërmit e çifti Meta-Kryemadhi kanë në pronësi të paktën 17 pasuri, ku përfshihen vila, pallate dhe toka. Besoj se SPAK i ka identifikuar këto pasuri. Nëse e ka pasur të vështirë t’i gjejë, ua jap unë letrat. Monika Kryemadhi është aksionere në disa pasuri, të cilat nuk i ka deklaruar në ILDKPKI, siç ka deklaruar vilën në Gjirin e Lalëzit, pallatin në Laprakë, apartamentin 500 m2 te Kodra e Diellit etj”, shkruan ai. Madje së fundmi u zbulua se babai i Ilir Metës, Rexhep Metaj, rezulton pronar i një apartamenti në Gjirin e Lalzit, me sipërfaqe 76 m2, me vlerë 60 mijë euro. Ky apartament është blerë në gusht të vitit 2023. Së pari, në Gjirin e Lalzit një apartament 76 m2 nuk kushton 60 mijë euro. Me 60 mijë euro mund të blesh një garazh, por jo apartament. Së dyti, edhe sikur SPAK dhe publiku të besojë se apartamenti paskërka kushtuar 60 mijë euro, nuk dihet se cili është burimi parave. Babai i Ilir Metës ka si të ardhura të ligjshme një pension, pak më të lartë se të nënë Selvisë, por që nuk mjafton as për shpenzimet mujore.