Personazhi i njohur i drejtësisë shqiptare Emiljano Shullazi vazhdon të jetë në betejë me togat e zeza, pasi nisja e procesit gjyqësor ndaj tij dhe anëtarëve të grupit G. Dani, E. Qyqja, E. Zela dhe B. Shullazi është shtyrë sërish. Proces i cili ka dështuar për dy vite me radhë. Në këto kushte Shullazi, këtë herë ka vendosur të paraqesë përballë togave të zeza, në seancën e zhvilluar paraditen e djeshme, një avokate amerikane, e cila do të monitorojë procesin. Lambrini Nasiss do të grumbullojë gjithë shkeljet që sipas tyre janë bërë në Gjykatën e Shkallës së Parë dhe Gjykatën e Apelit të Posaçëm. Ndërsa pritet që me marrjen për mbrojtje të kësaj të fundit, çështja e Shullazit të zhvendoset në Gjykatën e Strasburgut. Sakaq theksojmë se gjatë seancës ditën e djeshme, janë zhvilluar edhe debate të shumta midis palës mbrojtëse dhe trupës gjykuese, ku avokatët dhe të pandehurit kanë kërkuar përjashtimin e gjyqtares Muça. Sipas tyre kjo gjyqtare ka shqyrtuar një kërkesë të bashkëpunëtorit të drejtësisë në lidhje me këtë çështje dhe për këtë arsye nuk mund të jetë pjesë e trupës gjykuese. Rrëzimi i kërkesës së avokatëve dhe të pandehurve është komunikuar paraditen e djeshme, çka ka shkaktuar edhe debate e diskutime lidhur me këtë çështje. Ndërsa kujtojmë se Shullazi është dënuar me 14 vite burg për gjobëvënie dhe grup të strukturuar kriminal. Sakaq, pala mbrojtëse i kërkoi gjykatës disa muaj më parë lirimin e klientëve të tyre me argumentin se gjykata duhet të rivlerësonte masën për 5 të pandehurit, 10 ditë pas krijimit të Gjykatës kundër Korrupsionit dhe Krimit të Organizuar. Theksojmë se Shullazi konsiderohet si organizator i atentatit ndaj biznesmenit Vajdin Lamaj dhe mikut të tij Artan Arsi. Ndërsa emri i tij është lakuar nga i penduari i drejtësisë Luftar Reçi. Sipas dëshmisë se të penduarit Luftar Reçi ka qenë Viktor Ymeri, i cili nga burgu ka gjetur personin në llogari të Shullazit që do të kryente këtë ekzekutim.
Avokatja amerikane: Çdo person ka të drejtë të ketë një proces të rregullt
Në përfundim të procesit avokatja amerikane e Emiljano Shullazit, Lambrini Nassis ka reaguar duke thënë se çdo person ka të drejtë të ketë një proces të rregullt. Gjithashtu edhe avokati tjetër i Shullazit, V. Meçe mësohet të ketë thënë se do i drejtohen Gjykatës së Lartë, Gjykatës Kushtetuese madje edhe në Strasburg, duke pretenduar se u janë shkelur të drejtat e të pandehurve. Ai gjithashtu ka shtuar se me shkeljet e shumta që janë konstatuar është më se e drejtë që avokatja amerikane të përfaqësojë çështjen “Shullazi” në Strasburg. “Sepse kemi parë se gjykata po bën 2 vjet që po shkel të drejtat e të pandehurve. Në seancën e kaluar kemi kërkuar përjashtimin e gjyqtares dhe një nga gjyqtaret e Apelit në mënyrë haptazi të kundraligjshme ka rrëzuar kërkesën, sikurse dhe kryetarja e gjykatës s’ka pranuar kërkesën e dorëheqjes së kësaj gjyqtareje. Përveç të tjerave avokatja është specialiste e të drejtave të njeriut. Me shkeljet e shumta që janë konstatuar kjo çështje do të shkojë në Strasburg. Është normale që avokatja amerikane të na përfaqësojë në Strasburg. Do i drejtohemi Gjykatës së Lartë dhe organeve të tjera, të cilat janë mbështetëse të reformës në drejtësi në mënyrë të veçantë OPDAT”, mësohet të ketë thënë ajo.
