Një lajm të hidhur ka ndarë drejtori i Përgjithshëm i Institutit Kombëtar për Integrimin e Jetimëve, Ilir Çumani. Ky i fundit bën me dije se ka humbur jetën personazhi i famshëm i qindra memeve pikante që njihet nga të gjithë si “Ver Llapa”.
Bohemi që u shndërrua në mik por edhe përqeshës i shumë politikanëve. Ilir Çumani i shpreh ngushëllimet duke e shoqëruar postimin edhe me një përkushtim plot dashuri dhe vlerësim.
“PËRSHPIRTJE PËR NJERIUN E MIRË…. Jetove në mes tonë duke e sfiduar mjerimin tënd të bardhë në këtë botë hipokrite, tinëzare e të marrë fund, duke u tallur aq bukur e mençurisht me ironinë e fatit, gjithë gazmend e stoik, plot indiferentizëm e shpërfillje të gjithë këtij realiteti absurd ku bashkëjeton në mënyrë të pistë dhe absurde superluksi i pakicës së pushtetshme me mjerimin masiv të shumë të ngjashmëve të tu, si për të treguar se asgjë në këtë jetë nuk është e pafundme…
Ndaj, asgjë nuk duhet marrë seriozisht… Ishe engjëlli më i bukur dhe më i pafajshëm mbi këtë tokë, një dëshmi e gjallë ku luhet drama Njerëzore, shkaktuar prej makutërve të panginjur e zemër katranë të pashpirtë, por të pangjashëm me pafajësinë dhe shpirtin tënd të bukur e të dëlirë naiv… Ik VERI, prehu i qetë prej gjithë atij stërmundimi e përvuajtje të paepur që dëshmove në jetën tënde, një sakrificë prej cigani e bohemi që aq shumë ta adhuroja… Pusho në Paqe o NJERI ….. I mrekullueshëm i Zotit. R.I.P”, shkruan Çumani.
