“Los Blancos” fituan 3-2 përballë, por situatën e komplikoi fitorja e thellë 6-0 e Borusia Munshengladbah ndaj Shakhtar Donetskut. Bajerni e Liverpuli s’ndalen
Reali i Madridit u përball mbrëmë me Interin, në grupin B të UEFA Champions League. Takimi u luajt në Madrid dhe shfaqi një baraspeshë në shumë tregues, sidomos gjatë pjesës së parë. Rastet nuk munguan dhe golat gjithashtu. Reali i Zidanit dëshmi se ruan staturë “mbretërore” edhe në ditët e tij të këqija, kurse Interi i Kontes luajti më i kujdesur në fazën ofensive, duke zgjedhur kundërsulmin si mjet më efikas për objektivin e tij. Pas një mori rastesh të shpërdoruara nga të dy ekipet, do të mjaftonte një gabim gjatë kthimit të topit nga interistët, në minutën e 25-të, ku do të përfitonte Karim Benzema, i cili shfaqet përballë portierit Handanoviç dhe pasi e shmang e dërgon topin në rrjetë. Realizimi i golit i jep motivim Realit të avancojë përpara, kurse Interi humbi lidhjen e reparteve, duke ia dorëzuar mesfushën skuadrës “Los Blancos”. Kjo solli epërsinë e Realit në fazën ofensive, gjë që u shpërblyer me golin e dytë të shënuar nga Ramos me kokë, pas një goditje këndi, në minutën e 33-të. Gjithsesi, një mori kombinimesh të sakta nxjerrin në pozicion ballor Lautaro Martinezin, i cili nuk fal me goditjen e tij në hyrje të zonës, duke shënuar për zikaltrit. Pjesa e parë u mbyll 2-1 për madrilenët. Në pjesën e dytë vijoi e njëjta “melodi”, por me Interin më kërkues, ku Perisiç barazoi shifrat në 2-2 në minutën e 68-të. Por Viniciues do të kthente epërsinë e Realit në minutën e 80-të. Po në grupin B, Borusia Munshengladbah fiksoi një rezultat tenistik në transfertë përballë Shakhtar Donetskut, ku fitoi 0-6 dhe kapi kreun e renditjes me 5 pikë, duke e komplikuar së tepërmi pozitën e Realit dhe të Interit në këtë grup si ekipe favorite. Në grupin A, Bajerni i Mynihut arriti të fitojë e ndoshta dhe të kualifikohet më tej, pasi mposhti në transfertë 6-2 Salzburgun dhe ndodhet në krye të renditjes me 9 pikë. Kurse Atletiko e Madridit barazoi 1-1 ndaj Lokomotivës së Moskës dhe mbetet në vend të dytë me 4 pikë. Në grupin C, Mançester Siti dhe Porto hodhën një hap përpara drejt kualifikimit pas fitoreve të tyre në grup respektivisht përballë Olimpiakosit dhe Marsejës me të njëjtin rezultat (3-0). Në grupin D, Liverpuli vijon të marshojë drejt kualifikimit, pas suksesit të mbrëmshëm ndaj Atalantës (5-0), kurse Ajaksi fitoi me vështirësi 2-1 ndaj Mitdjaelland.
