Ish kryeministri Sali Berisha ka deklaruar se vrasësit e Haklajve janë të njëjtë që vranë Azem Hajdarin.
Gjatë një prononcimi për emisionin Opinion mbrëmjen e së hënës, Berisha tha se Haklajt e Tropojës i vrau shteti, duke mohuar të ketë gisht në ngjarjet e rënda.
“Ata që vranë Azemin zhdukën dhe Haklajt. Ata duhet të zhdukeshin, sepse kryen krimin e shekullit. Ata ishin terroristë. Kurrë Tropoja nuk ka njohur një bandë plaçkitëse të këtij lloji, përdhunues e kriminale. Vetëm shteti mund t’i vriste ata. Vetëm shteti mund të bënte diçka të tillë, duke bërë kombinime me familjet e viktimave. Ata ishin të angazhuar.”
Kujtojmë se Zylfie Haklaj, drejtoi gishtin publikisht tek Sali Berisha për vrasjen e vëllezërve të saj.
“Në familjen time ka 14 persona të vrarë dhe përgjegjës kryesor për këtë është Sali Berisha. Ne kërkojmë drejtësi, unë jetoj për të dëshmuar”, deklaroi Zylfie Haklaj.