Virusi i frikshëm po merr përmasa alarmante, ku vazhdon të rritet numri i viktimave dhe personave të prekur nga koronavirusi. Në mbledhjen e ditës së sotme të Taks Forcës në Rinas, drejtoresha e Institutit të Shëndetit Publik, Albina Fico, tha se në laboratorët e këtij institucioni janë të mjaftueshme kitet dhe ragentët për të kryer analizën e koronavirusit, në rastet kur do të ketë dyshime të mundshme.
Fico tha se risku për Shqipërinë është i ulët. Ajo shpjegoi se fakti që koronavirusi ka prekur Italinë fqinje nuk e rrit riskun në vendin tonë.
“Kemi numrin e duhur të kiteve dhe të ragentëve për të bërë analizat në laboratorët e ISHP-së. Risku për Shqipërinë është i ulët. Fakti që është në Itali, nuk e ndryshon nivelin e riskut brenda në Shqipëri. Alerti është parapërgatitje e mirëmenduar nëse do të kemi disa zhvillime të reja. Ne vijojmë të kemi risk të ulët, nuk kemi rast të konfirmuar”, tha drejtoresha e ISHP-së.
